Ötən mövsüm həm Frankfurt “Ayntraxt”ının heyətində, həm də dünya çempionatında Fransa yığmasının heyətində oyunu ilə diqqəti çəkən Randal Kolo Muani boykota əl atmalı olub.

“Football-plus.az” xəbər verir ki, məsələ burasındadı ki, 24 yaşlı hücumçu PSJ-yə keçmək istəyir. “Ayntraxt” rəhbərliyi isə artıq Paris nəhənginin iki təklifini geri çevirib. PSJ əvvəlcə almanlara bonuslarla birlikdə 80 milyon avro təklif etmişdi. İkinci təklif 65 milyon avro və gənc oyunçu Yuqo Ekitikedən ibarət oldu. Amma “Ayntraxt” bu təkliflərin heç birini bəyənməyib. Rəhbərlik Kolo Muaniyə görə 100 milyon avrodan aşağı heç bir təklifi dəyərlənidmək niyyətində deyil. PSJ isə bu məbləği ödəmək istəmir. Son günlərə qədər futbolçunun mövqeyi bəlli deyildi. O, belə desək, başını aşağı salıb futbolunu oynayırdı. Amma son iki gündə Kolo Muani sərt mövqeyini ortaya qoydu. İstedadlı futbolçu əvvəlcə Fransa mətbuatına açıqlamasında bunları dedi: “Bu səviyyəyə çatmağımda “Ayntraxt”ın böyük rolu var. Həmişə bu klubun uğurları üçün meydanda var gücümlə oynamışam. Amma PSJ mənə görə rekord təklif irəli sürüb. Belə fürsət həyatda heç də hər gün ələ düşmür. Ona görə də bu kluba keçmək istəyirəm. Ümid edirəm ki, “Ayntraxt” bu transferə razılıq verəcək”.

Dünən isə məlum oldu ki, Kolo Muani “Ayntraxt”la məşqə çıxmaqdan imtina edib, üstəlik Parisə yollanıb! Frankfurt klubunun idman direktoru Markus Kreşe oyunçunu bu addımına görə tənqid atəşinə tutub: “Randalı tam başqa tərəfdən tanıdıq. Onun əsl simasını gördük. Başa düşürük ki, indi onun üzərində böyük təzyiq var. Amma son addımı düzgün deyil. Bu barədə həm özünə, həm də yaxınlarına iradımızı bildirdik. “Levski”yə qarşı cavab oyununu onsuz keçirməli olacağıq. Bir futbolçunun özünü belə aparması onun transfer durumuna heç cür təsir etmir. İndi bütün diqqətimizi “Levski” ilə oyuna yönəltmişik. Bu oyun klubun gələcəyi baxımından önəmlidi. Heyətimiz onsuz da yaxşı və rəqabətədavamlıdı”.

“Nant”ın yetirməsi olan və ötən yay “Ayntraxt”a transfer olunan Kolo Muani indiyə qədər bu klubun heyətində 50 rəsmi oyunda 26 qol vurub.