De Byazi Azərbaycan premyer-liqasının səviyyəsindən danışdı
Azərbaycan milli komandasının baş məşqçisi Canni De Byazi maraqlı açıqlama ilə diqqət çəkib.
Football-plus.az xəbər verir ki, italiyalı mütəxəssis "Tribalfootball" nəşrinə danışıb. O, başqa bir milli komandadan və 2 klubdan təklif aldığını etiraf edib:
"Mənimlə çalışmaq istəyənlər var idi. Biri digər milli komandadan, ikisi isə İtaliya klublarından idi. Amma AÇ-2024-ün seçmə mərhələsi ərəfəsində komandada işləməyə davam etmək istəyirdim. Bu püşkatmada Albaniya kimi bəxtimiz gətirmədi. Daha əvvəl AÇ-2016-nın püşkatma mərasimində başıma gəlmişdi. Mən Albaniyanın baş məşqçisi olduğum zaman çox çətin qrupa düşmüşdük və əsas mərhələyə vəsiqə qazana bilmişdik. Ümid edirəm ki, bu dəfə də eyni şeyi bacaracağam. Amma buna nail olmaq çox çətin olacaq. Düşünürəm ki, Azərbaycan millisi üçün bütün matçlar çox çətin olur. Belçika böyük ulduzları olan, FIFA reytinqində birinci yerdə komandadı. Yüksək səviyyəli futbolçuları var. İsveç haqqında düşünürəm ki, bu, Avropanın ən yaxşı liqalarında oynayan futbolçulara sahib, fiziki cəhətdən çox güclü bir komandadır. Avstriyaya gəlincə, yığma təkcə Alaba deyil, həm də bundesliqada oynayan digər futbolçulardan ibarət çox güclü komandadı. Bizim futbolçularımızın çoxu yerli çempionatda oynayırlar. Ona görə də bu, komandamız üçün çox çətindi".
De Byazi Azərbaycan premyer-liqası haqda da danışıb:
"Azərbaycan çempionatının səviyyəsi ildən-ilə yaxşılaşır. Burada yaxşı oyunçularımız var. Amma yeganə problem odu ki, seçim şansımız çox deyil. Builki çempionat 10 komandanın iştirakı ilə keçirilir. Bu komandaların hər biri əsas heyətdə 7 əcnəbi futbolçu ilə oynayırlar. Yəni, mənim üçün cəmi 40 oyunçu qalır. Hər komandadan 4 oyunçu seçmək imkanım var. Yaxşı işlər gördük. 2000, 2001-ci il təvəllüdlü çoxlu gənc oyunçulardan ibarət qrup yaratdıq. Bu futbolçular müntəzəm olaraq oynayırlar. Ümid edirəm ki, onlar daha da böyüyə bilərlər".
Digər xəbərlər
