Harri Keynin az qala yay boyunca davam edən transfer dastanının təfərrüatından xəbərdarsız.

“Football-plus.az” xəbər verir ki, əlbəttə, onun müştəriləri çox idi. Amma “Tottenhem”in prezidenti Deniel Levi ilə danışıq aparmaq çox uzun və bezdirici məşğuliyyət olduğuna görə “Real” və MY kimi nəhənglər bu sevdadan vaz keçdi...

Keyn az qala bütün karyerasını “Tottenhem”ə həsr edib. Nəhayət, 30 yaşında başqa ölkədə gücünü sınamağa qərar verdi və “Bavariya”ya keçməyə razılaşdı. Ancaq “mahmızlar” ulduzunu asanlıqla buraxana bənzəmirdi. Levi Münhen klubunun rəhbərliyinin, hər iki komandanın fanatlarının, hətta Harrinin özünün də əsəblərini korladı. Sonradan Uli Höness deyəcəkdi ki, tərəflər artıq bütün məsələləri razılaşdırandan sonra da Levi və ətrafı transfer şərtlərini dəyişməyə çalışıb. Sən demə, Keynin tam Münhenə yola çıxması ərəfəsində “Tottenhem” əfsanəsi ilə heç də gözəl davranmayıb. “The Telegraph” qəzetinin yazdığına görə, “Bavariya”ya transferinin sonuclanmasına bir neçə saat qalmış Harriyə “mahmızlar”ın məşq bazasını ziyarət etmək qadağan olunub. Adı çəkilən nəşrə inansaq, klub elektron məktubda ingiltərəli hücumçuya rəsmi şəkildə xəbərdarlıq edib ki, bazaya qayıtması məqsədəuyğun deyil. Transferinin baş tutmayacağından ehtiyatlanan Harri londonlularla məşqləri davam etdirmək istəsə də, rədd cavabı alıb. Keyn hətta “Tottenhem”in personalı və oyunçuları ilə də şəxsən görüşə, vidalaşa bilməyib. Artıq transfer rəsmiləşəndən sonra həmklublarına və baş məşqçiyə zəng edərək sağollaşıb.

Hələ bu harasıdı?! Harri klub bazasındakı əşyaları da götürə bilməyib, yaxınlarına isə onun stadiondakı nömrəsinə daxil olmağa icazə verilməyib. Ailə artıq Almaniyaya köçəndən sonra qalan əşyaları poçt vasitəsi ilə ala bilib.

Yaxşı ki Münhendə ingiltərəli ulduzun işləri yaxşı gedir. O, bundesliqada keçirdiyi ilk iki oyunda üç qol və məhsuldar ötürmə ilə yadda qalıb. Deniel Leviyə qalan isə yalnız pislikdi. Doğrudanmı, Keyn belə münasibəyə layiq idi?