Fransa yığması DÇ-2022 ərəfəsində daha iki oyunçusunu itirib.

Football-plus.az xəbər verir ki, bununla da sonuncu dünya çempionunda itkilərin sayı 4-ə çatıb.

Fransa Futbol Federasiyasının mətbuat xidmətinin məlumatına görə, PSJ-nin müdafiəçisi Presnel Kimpembe zədə səbəbindən Qətərdəki mundialda iştirak etməyəcək. Onun əvəzinə “Monako”nun mərkəz müdafiəçisi Aksel Disasi yığmaya çağırılıb.

Kristofer Nkunku da mundialı buraxacaq. “Leyptsiq”in 25 yaşlı hücumçusu məşqdə top uğrunda mübarizə apararkən Eduardo Kamavinqa ilə toqquşmadan sonra zədələnib. İştirak ərizəsindən çıxarılan futbolçunu “Ayntraxt”da (Frankfurt) oynayan Randal Kolo Muani əvəzləyib.

Xatırladaq ki, yarımmüdafiəçilər Pol Poqba ilə Nqolo Kante də zədə səbəbindən qarşıdakı turnirdə görünməyəcəklər. Fransa millisi noyabrın 20-dən dekabrın 18-dək keçiriləcək mundialda Danimarka, Avstraliya və Tunislə birlikdə D qrupunda mübarizə aparacaq.