2000-ci illərin ortalarında oyunu ilə futbolsevərləri valeh edən “Qızıl top”un sahibi Ronaldinyo yenə hüquq-mühafizə orqanları ilə problem yaşamaq üzrədi.

"Football-plus.az" xəbər verir ki, “Barselona”nın və Braziliya yığmasının sabiq ulduzu hələ ötən həftənin əvvəllərində məhkəmə qarşısına çıxmalıydı.

Belə ki, ona məxsus olan kripto məzənnə şirkəti firıldaqçılıqda günahlandırılır. Braziliya prokurorluğunun iddiasına görə, Ronaldinyoya məxsus olan “18KRonaldinho” adlı şirkət investorlara gündəlik 2 faiz gəlir vəd edibmiş. Amma həmin şirkət artıq neçə müddətdi hesablarını dondurub və invsetorlara heç bir pul ödəmir. Məlum olub ki, bu şirkətin hazırda 56,5 milyon avro borcu var! İnvestorlar, təbii ki, məhkəməyə üz tutaraq onlara dəymiş ziyanın qarşılanmasını tələb edirlər. “18KRonaldinho” şirkəti ilk açıldığı dönəmdə zərgərlik malları və bahalı saatların satışı biznesi ilə məğul olurdu. Amma prokukorluğun fikrincə, çox keçmədən bu şirkət bu biznesdən çəkilərək kripto məzənnə ilə bağlı maliyyə piramidasına çevrilib. Ronaldinyonun rəsmiləri iddia edir ki, o özü bu şirkətin qurbanı olub. Guya şirkət sabiq futbolçunun icazəsi olmadan onun adından və imicindən istifadə edib. Məsələni qəlizləşdirən odu ki, Ronaldinyo ifadə vermək üçün iki dəfə prokukorluğa çağrılsa da, hər iki halda logistika problemini və əlverişsiz hava şəraitini əsas gətirərək dəvəti geri çevirib. Braziliya mətbuatının yazdığına inansaq, 3-cü dəvəti də geri çevirəcəyi təqdirdə o, artıq həbs oluna bilər! Deyilənə görə, Braziliya polisi 43 yaşlı sabiq oyunçunun evinə getsə də, onu evdə tapmayıb. Evdə axtarış aparılıb və onun şəxsiyyət vəsiqəsi ələ keçirilib. Araşdırma davam etdiyi müddətdə Ronaldinyonun Braziliyanı tərk etməsinə qadağa qoyulub.

Qeyd edək ki, bu, Ronaldinyonun başına gələn ilk belə hadisə deyil. 2022-ci ilin martında o, Paraqvay sərhəddini saxta sənədlərlə keçməyə çalışarkən həbs olunmuşdu. Bir müddət sonra “sambaçı” qardaşı ilə birlikdə 1,6 milyon dollar girov qarşılığında azadlığa buraxılmışdı. Həmin vaxt qardaşlar Paraqvayda ümumilikdə 171 gün ev dustağı kimi keçirmiş və paytaxt Assunsyonda qaldıqları oteli tərk edə bilməmişdilər.