Ronaldinyonun yaşıl meydana gözlənilən qayıdışı reallaşıb. Braziliya yığmasının sabiq hücumçusu İspaniya medialiqasında debüt edib.

"Football-plus.az" xəbər verir ki, o, “Porsinyos”un heyətində Krallar Liqasının 8-ci turunun “Pio” ilə matçında meydana çıxıb. 

Ronaldinyo ilk hissənin 5-ci dəqiqəsində kapitan sarğısını Kiliandan alaraq ehtiyatdan meydana daxil olub. Amma DÇ-2002-nin qalibi heç də parlaq günlərini xatırlada bilməyib. Artıq çəkidən əziyyət çəkən 42 yaşlı Roni çox ağır görünüb. Amma onu buna görə qınamaq düzgün olmaz. Hər halda, peşəkar futbolçu karyerasını 2015-ci ildə başa vurub. Matçın əsas vaxtı qolsuz heç-heçə başa çatıb. Oyundan sonrakı bullit seriyasında isə “Porsinyos” 1:3 hesabı ilə məğlub olub. Bu seriyada Ronaldinyoya topa yaxınlaşmaq növbəsi çatmayıb. “Marca”nın yaydığı məlumata görə, oyunun bütün platformalarda yayınını 2 milyon 120 min 962 tamaşaçı izləyib.

Krallar Liqası “Barselona”nın sabiq müdafiəçisi Xerard Pike tərəfindən təşkil olunur. Bu yarışdakı oyunlar 40 dəqiqəlik müddətdə keçirilir. Komandalarda bir sıra tanınmış sabiq futbolçular və şou-biznes ulduzları iştirak edirlər.

Ronaldinyodan söz düşmüşkən, onun oğlu Joao Mendeşin “Barselona” ilə müqavilə imzaladığını da bildirək. Klubun rəsmi saytı 18 yaşlı hücumçunun 1,5 illik sözləşməyə qol çəkdiyini xəbər verib. Joao Mendeş “Barselona”nın U-19 komandasında çıxış edəcək. “Kruzeyro”nun yetirməsi olan futbolçu bu ilin yanvarından Kataloniya klubunda baxışda idi. 

Xatırladaq ki, onun atası “Barselona”da 2003-08-ci illərdə oynayıb, 2016-cı ildən klubun rəsmi səfiridi.