“Araz-Naxçıvan” oyunlarına azarkeşləri məcburi gətirir? - AÇIQLAMA
Premyer-liqada çıxışı ilə diqqət mərkəzinə düşən “Araz-Naxçıvan”ın Abşeron rayonunun bələdiyyələrində çalışan yaşlı şəxsləri məcburi oyunlarına gətizdirdiyini diqqətinizə çatdırmışdıq.
“Football-plus.az” xəbər verir ki, nümayəndələr həmin şəxslərin komandanı məcburi dəstəkləməsini istəyir. Məsələ ilə bağlı “qırmızı-ağlar”la əlaqə saxladıq. Klubun icraçı direktoru Eldəniz Yusubov bu xəbəri qəti şəkildə inkar etdi:
“Belə bir şey yoxdu. Stadionda komandamızı dəstəkləyənlərin hamısı bunu könüllü şəkildə edirlər. Biz yeni fanklub formalaşdırmaq istəyirik. Düzdü, oyunlarımıza gələn azarkeş sayı məni qane etmir. Hələ ki başlanğıc nöqtəsindəyik. Gündən-günə arenaya daha çox tamaşaçı gələcək”.
Klub rəsmisi fanklubun adının hələ ki bəlli olmadığını da diqqətimizə çatdırdı:
“Hələ azarkeş qrupu formalaşsın, ondan sonra özləri adla bağlı qərar verərlər. Düzdü, “Nəqşicahan” fanklubu var. Amma biz yenisini yaratmaq istəyirik. Ad məsələsi sırf azarkeşlərə aid olacaq bir şeydi. Bu fanklub nə Bakı, nə də Naxçıvan üçün nəzərdə tutulub. Bütün oyunlarımızda bizimlə birgə olacaq. Ümid edirik ki, hər şey istəyimiz kimi və qaydasında olar”.
İLKİN SULTANLI
Digər xəbərlər
