Futzal üzrə Çempionlar Liqasında ilkin mərhələnin oyunları sona çatdı.

“Araz-Naxçıvan” qrupda qaldısa, 9 komanda əsas mərhələyə yüksəlməyi bacardı. Bilindiyi kimi, Azərbaycan çempionunun məqsədi ölkəmizin Avropadakı nüfuzunu bərpa etmək idi. Lakin həlledici matçda “Riqa”nın darmadağın etdiyi komanda (3:8) mübarizəni dayandırdı.

"Football-plus.az" olaraq, “Araz-Naxçıvan”ın baş məşqçisi Vitali Borisovla söhbətdə uğursuzluğun səbəblərini öyrənməyə çalışdıq.

– İlk iki matçda yaxşı nəticə əldə edərək azarkeşləri sevindirmişdiz. Son oyunda ağır məğlubiyyət yaşadız. Qələbəyə nə mane oldu?
- Sözün düzü, ilk iki rəqib “Riqa”ya nisbətən asan idi. Onları planlarımıza tabe etməkdə çətinlik çəkmədik. Rahat qələbələr qazandıq. “İstanbul Şişli” həvəskar komanda idi. Deyərdim ki, heyətlərində tam professional futzalçılar iştirak etmirdi. “Yan Regensburq”a gəlincə, bu komandaya daha çox qol vura bilərdik. Gözlədiyimdən daha zəif çıxış etdilər. “Riqa” ilə matçda isə çoxlu səhvə yol verdik. İlk hissədə daha yaxşı çıxış etmişdik. Ümidim var idi. Sonradan çatışmazlıqlar özünü biruzə verdi. Məncə, başlanğıcdakı oyunumuzu davam etdirsəydik, qələbə qazana bilərdik.

- Komandanın Latviya çempionuna qarşı hər iki hissədə mübarizə aparmağa qadir olmadığını deyə bilərik?
- Xeyr. Fiziki cəhətdən özümüzü yaxşı hiss edirdik. Bütün ehtimallara hazırlıqlı getmişdik. Məncə, ikinci yarıda hakimin qərəzli qərarları komandanı ruhdan saldı. Amma məğlubiyyəti məhz bununla əlaqələndirmirəm. Başqa çatışmazlıqlar da var idi.

- Xatırlayıram ki, klub rəhbərliyi təyinatınla bağlı danışanda oyunçuların seçimində sərbəst olduğunu və kimi istəsən, sərəncamına gətirəcəyini demişdi. Bu baş tutmadı? Yoxsa transferlər zamanı uğursuz qərarlar verdin?
- Yeni futzalçıları üç oyunla qiymətləndirmək istəmirəm. Amma bütün oyunçularım qane edir desəm, yalan olar. Ümid edirəm ki, səhvlər, sadəcə, bir oyunluq idi. Qarşıdakı matçlarda bu yöndə davamlılıq gördüyüm üzvlərlə sağollaşacam. Rəhbərliyə gəlincə, tam razıyam. Seçdiyim oyunçuları transfer etdilər. Bəziləri alınmadı ki, bu da maliyyə ilə bağlı deyildi. Onlar başqa klublara söz vermişdilər. Əlavə pul təklif etsək də, razı olmadılar.

- Avqustun əvvəlində iki özbəkistanlı futzalçı - Dilşod Rahmatov və Husniddin Nişonov transfer edildi. Lakin Çempionlar Liqasının iştirak ərizəsində adlarına rast gəlmədik...
- Təəssüf ki, onları Latviyaya apara bilmədik. Hər ikisinə çox güvənirdim. Təcrübəli oyunçulardı. Bizimlə 20 gün məşq etmişdilər. Özlərini yaxşı tərəfdən göstərirdilər. Son anda vizayla bağlı problem yaşadıq. Deyərdim ki, onlar “Riqa”ya qarşı çıxış etsəydilər, nəticə fərqli ola bilərdi.

- “Araz-Naxçıvan” rəhbərliyi nəticələrlə bağlı sizə nə dedi? Bu mövsüm Avropada ciddi hədəflər haqda danışılmışdı.
- Hələ ki görüşməmişik. Çox güman sabah nəticələri müzakirə etmək imkanımız olacaq.

- Hədəflərlə bağlı dəyişiklik və ya yeni planlarla bağlı qərar gözlənilir?
- Yox, hədəflərimiz dəyişilməz qalır. Yeni mövsümdə də çempion olub bu dəfə yarıda qoyduğumuz işi tamamlamağa çalışacağıq.

- Komandanın komplektləşdirilməsi prosesi tamamlanıb?
- Bəli. Seçimlər yekunlaşıb. Qış fasiləsinə qədər nə ayrılıq, nə də transfer olacaq. Bildiyimə görə, fasilədə növbəti mövsüm Çempionlar Liqasında iştirak edəcək heyəti formalaşdırmağa başlayacağıq.

- DÇ-2024-ün elit mərhələsinin başlamasına da az qalıb. Həm də yığmanın baş məşqçisi olduğunuzu nəzərə alsaq, planlar necədi?
- Yaxın günlərdə Bakıda məşqlərə başlamaq istəyirik. Ruminiya, Niderland və Qazaxıstan kimi çətin rəqiblərlə üz-üzə gələcəyik. Heyəti çox ciddi formalaşdırmaq lazımdı. Onu deyim ki, yığmada daha “Araz-Naxçıvan”ın üzvlərinə üstünlük verilməyəcək. Çalışacam ki, digər təcrübəli futzalçıların da xidmətindən yararlanım. Ümumiyyətlə, DÇ-2024-də minimum 2-ci yer uğrunda mübarizə aparacağıq. Seçimləri hədəfə uyğun etmək mütləqdi.

KƏNAN BAHADIR