Avropa Liqasının pley-offunda “Qarabağ”la qarşılaşacaq “Olimpiya”nın səfər proqramı müəyyənləşib.

"Football-plus.az" xəbər verir ki, Lyublyana təmsilçisi dünən gecə yola çıxıb. Komandanı Bakıya gətirəcək təyyarə saat 05.35-də Heydər Əliyev Beynəlxalq Hava Limanına enib. Sloveniya çempionu “Fairmont” otelində məskunlaşıb. Rəqibi dəstəkləmək üçün təxminən 15 azarkeşin gəlməsi gözlənilir. Lakin onlar “Olimpiya” ilə birgə ölkəmizə təşrif buyurmayacaqlar. Azarkeşlər əvvəlcə İstanbula, daha sonra Bakıya səfər edəcək.

Yeri gəlmişkən, “Qarabağ”la “Olimpiya”nın cavab oyunu ərəfəsində son məşqlərinin vaxtı müəyyənləşib. Hər iki komanda son hazırlığı matçın keçiriləcəyi Tofiq Bəhramov adına Respublika stadionunda görəcək.

Avqustun 30-u, saat 18.30-da əvvəlcə Azərbaycan çempionu meydana çıxacaq. Bundan yarım saat əvvəl baş məşqçi Qurban Qurbanov mətbuat konfransında iştirak edəcək. Qonaq komandanın açıq məşqi isə 20.00-a planlaşdırılıb. Lyublyana təmsilçisinin baş məşqçisi Joao Enrike saat 21.20-də media nümayəndələrinin sualarını cavablayacaq. Bu arada Sloveniya çempionatında 6-cı turun oyunları keçirilib. “Olimpiya” evdə “Çelye”yə 2:4 hesabıyla uduzub. “Qarabağ”ın rəqibi 6 turdan sonra 9 xalla 3-cü pillədə qərarlaşıb.