Son iki ildə dövlətin futbola qayğısı daha aşkar görünür.

Ən azı premyer-liqanın 2022/23 və 2023/24 mövsümündə iştirak edən 10 klubun hər birinə 3 milyon manat vəsaitin ayrılması bunun bariz nümunəsidi. Cari “futbol ili”ndə isə 1-ci liqa təmsilçilərinə 300, 2-ci liqa təmsilçilərinə 50 min manat veriləcək. Bu da edir 3 milyon 700 min manat. Yəni dövlət ümumilikdə bu mövsüm Azərbaycan futbolundakı peşəkar komandalara 33 milyon 700 min manat maliyyə ayıracaq. 34 klub istəsə, bu pulu infrastrukturun qurulması, heyətin formalaşması, səfər və ya stadion xərcləri üçün ayıra bilər. Seçim onlarlıqdı. Bir məqamı dəqiqləşdirim ki, bu maliyyə SOCAR-ın sosial layihələri çərçivəsində klublara ayrılır. Bunun qarşılığında ölkədə futbolun inkişaf etməsi gözlənilir. Yəni bu pul xalqındı, klublar ayrılan vəsaiti dədə malı kimi sağa-sola xərcləyə bilməz. Ən azı ilin sonunda audit yoxlamalarında bu pulun haqq-hesabı tələb olunur. Amma 3 milyonun hesabatını düz-əməlli verə bilməyən klublar da var idi ki, bu ayrıca yazının mövzusudu.

Deyəsən, dövlətin bu saxavətli davranışından sui-istifadə edənlər də var. Söhbət Misli premyer-liqasının 2022/23 mövsümündə sonuncu pillədə qərarlaşan “Şamaxı”dan gedir. Klub strategiya adı ilə heyətini yerli futbolçulardan formalaşdırdı. Bunun nəticəsində çempionatda sonuncu oldular. Düzdü, ədalət naminə deyə bilərik ki, “şirlər” yaxşı heyət formalaşdıraraq çempionatda gərgin mübarizənin getməsinə səbəb oldular. Həqiqətən də yerli futbolçular liqada çox əziyyət çəkdi. Gücləri çatması da, əziyyət çəkdilər. Ən azı 18 tur suni örtüklü meydanda rəqiblərini qəbul etdilər.
Lakin iki gün öncə bizə maraqlı və qəribə məlumat çatdı. Sən demə, “Şamaxı” rəhbərliyi klubdan ayrılan və icarəyə göndərilən 11 futbolçuya ümumilikdə 30 min 100 manat borcludu. Həmin oyunçuların siyahısını diqqətinizə çatdırırıq:

Rəhman Daşdəmirov - 2500 AZN (gazırda "Sabah"da çıxış edir)
Cəlal Hüseynov - 4000 AZN (hazırda "Arda"da çıxış edir)
Elvin Məmmədov - 4500 AZN (karyerasını bitirib)
Fuad Bayramov - 2000 AZN (hazırda "Zirə"də çıxış edir)
Elçin Mustafayev - 2000 AZN (hazırda "Araz-Naxçıvan"da çıxış edir)
Bahadur Həziyev - 2000 AZN (hazırda "Səbail"də çıxış edir)
Nihad Quliyev - 1200 AZN (hazırda "Qarabağ"da çıxış edir)
Kamal Mirzəyev - 2500 AZN (hazırda klubsuzdu)
Rəşad Əzizli - 3000 AZN (hazırda "Qəbələ"də çıxış edir)
Amil Yunanov - 4900 AZN (hazırda "Səbail"də çıxış edir)
Asim Əlizadə - 1500 AZN (hazırda klubsuzdu).

“Şamaxı” 1-ci liqa üçün yeni heyət formalaşdırıb. Redaksiyamıza daxil olan məlumata görə, yeni kollektivdəki oyunçuların pulu vaxtında verilib. Bəs nə üçün komandadan ayrılan və ya icarəyə göndərilən oyunçuların pulu ödənilməyib? Ötən mövsüm “Şamaxı”da maksimum maaş 4500 manat olub. Ortalama nəzərə alsaq, 1 milyona manata yaxın pul oyunçuların maaşına xərclənib. Qalan 1 milyon manat da səfərlərə, məşqçilərin məvacibinə və başqa xərclərə getsə, qalan 1 milyon manat hana? Yox e, bu komandaya premyer-liqada mübarizə aparmaq üçün lisenziya verilmişdi. Lisenziyanın şərtlərindən biri odu ki, klubda çalışanlara, futbolçulara borc olmamalıdı. “Şamaxı”nın oyunçulara veriləsi pulu varsa, AFFA kluba necə lisenziya verib? Deməli, klub rəhbərliyi federasiyanı aldadıb?

“Şamaxı” formalaşanda rəhbərlik söz vermişdi ki, “Keşlə” ətrafında söz-söhbətlərə görə yaranan pis imici aradan qaldırmağa çalışacaq. Deyəsən, “şirlər”in idarəçiləri bir mövsüm ərzində sabiqlərə dua oxutdurublar. Ən azı futbolçuların maaşının verilməməsinə görə belə deyirik.

İLKİN SULTANLI