“Qalatasaray”ın bəyənmədiyi hakim avrokuboklara təyinat aldı
Bu həftə avrokuboklarda türkiyəli hakimlərin təyinatları bəlli olub.
"Football-plus.az" xəbər verir ki, Hakan Ceylan “Tobol”la Plzen “Viktoriya”sı arasında Kostanay şəhərində keçiriləcək matçın VAR hakimi olacaq. Atilla Karaoğlan isə Fransada “Lill” ilə Xorvatiya təmsilçisi “Riyeka”nın görüşündə baş hakim olacaq. Hər iki oyun Konfrans Liqasının pley-offu çərçivəsində keçiriləcək. Karaoğlanın personası üzərində bir qədər geniş dayanmağa ehtiyac var. Məsələ burasındadı ki, əslən Sakaryadan olan 37 yaşlı hakim ötən həftəsonu superliqanın 2-ci turunun mərkəzi oyunu olan “Qalatasaray” – “Trabzonspor” matçını idarə etmişdi. Son çempion Mauro İkardinin qolları ilə 2:0 hesablı qələbə qazansa da, rəhbərlik və fanatlar bu hakimin idarəçiliyindən razı qalmamışdılar. “Cim-Bom”un başqanı Dursun Özbək hətta oyundan sonra əsəbi açıqlamalarıyla diqqəti çəkmişdi:
“73 yaşım var və 50 ildi oyunlara gedirəm. Daha öncə bu cür hakim faciəsinin yaşandığını görməmişdim. Aydın məsələdi ki, hələ mövsümün əvvəli olsa da, artıq indidən kimlərsə müəyyən işlər görməyə başlayıb. Atilla Karaoğlanı təbrik edirəm. Bir tapşırıq bundan gözəl yerinə yetirilə bilməzdi. Sadəcə, ayıbdı. Saşa Boenin çənəsinə dirsək atıldı. Sonrakı turlarda belə epizodları xüsusi diqqətlə izləyəcəyik. Baxaq görək başqa oyunlarda belə şeyə görə penalti veriləcək, ya yox? Və yaxud cərimə meydançası daxilində ayaqla rəqibi vurmağa görə penalti veriləcək, ya yox? Dris Mertensin ayağına təpiklə elə zərbə vuruldu ki, corabı yırtıldı. TFF bu epizodları izləsin və bizə şərh versin. Əks təqdirdə bu məsələyə görə hələ çox başlar ağrıyacaq. Baxaq görə TFF Karaoğlana cəza verəcək, ya yox?”
Yeri gəlmişkən, Dursun Özbək bu qalmaqallı sözlərinə görə Nizam-intizam Komitəsinə sövq edilib. Onun cəzası bu gün açıqlanacaq. Göründüyü kimi, bu oyundan bir neçə gün sonra Karaoğlan avrokubok matçına təyinat alıb. Onu da bildirək ki, bu referi bu ildən etibarən FİFA hakimi statusunu qazanıb. Yəni o, müvafiq olaraq məhz bu ildən avrokuboklara təyinat almağa başlayıb. Bu, onun Avropada 3-cü qarşılaşması olacaq. 2019/20 mövsümündən etibarən superliqa matçlarına təyinat alan hakim daha öncə KL-in 2-ci təsnifat mərhələsi çərçivəsində “Orxus” – “Brügge” (1:0) və KL-in 3-cü təsnifat mərhələsi çərçivəsində “Lex” – “Spartak Trnava” (2:1) oyunlarını idarə etmişdi.
Digər xəbərlər
