Bu həftə avrokuboklarda yeni mövsümə start verilir.

"Football-plus.az" xəbər verir ki, Çempionlar Liqası, Avropa Liqası və Konfrans Liqasının 1-ci təsnifat mərhələsinin ilk oyunları keçiriləcək. Hakim təyinatları ilə bəzi diqqqətçəkən məqamlar var. ÇL-də türkiyəli hakimlər briqadası da olacaq. Söhbət Arda Kardeşlerdən gedir. 35 yaşlı ədalət təmsilçisi Polşa çempionu “Rakuv”la Estoniya çempionu “Flora” arasındakı ilk oyuna təyinat alıb. Həmin görüş bu gün Bakı vaxtı ilə saat 22.00-da Çenstoxova şəhərində keçiriləcək. Bu matçda yan xətt hakimləri, 4-cü hakim və VAR hakimləri də Türkiyədən olacaq. Bu duelin bizim üçün maraqlı tərəfi odu ki, qalib 2-ci mərhələdə “Qarabağ”ın rəqibi ola bilər.

Digər təyinat isə Litva çempionu “Jalqiris” ilə Şimali Makedoniya çempionu “Struqa”nın oyunu ilə bağlıdı. Vilnüsdə baş tutacaq bu oyun da ÇL-in 1-ci təsnifat mərhələsi çərçivəsində keçiriləcək və Bakı vaxtı ilə saat 20.00-da başlayacaq. Oyunu, bilindiyi kimi, həmyerlimiz Elçin Məsiyev idarə edəcək. Yan xətt hakimləri Elşad Abdullayev ilə Pərvin Talıbov, 4-cü hakim Kamal Umudlu olacaq. Bu görüşün VAR briqadası isə türkliyəlilərdən ibarət olacaq! Belə ki, VAR hakimi Mete Kalkavan, onun köməkçisi isə Koray Gençerler olacaq. Bu dueli də həm türkiyəli, həm də azərbaycanlı futbolsevərlər diqqət mərkəzində saxlayacaq. Belə ki, onun qalibi 2-ci təsnifat mərhələsində “Qalatasaray”ın rəqibi olacaq.