Ölkəmizin qadın voleybolçulardan ibarət yığması dünən Avropa çempionatında ilk oyununu keçirdi.

"Football-plus.az" xəbər verir ki, Ataman Güneyligilin rəhbərlik etdiyi komanda turnirə Çexiya üzərində inamlı qələbə (3:0 – 25:21, 25:10, 25:15) ilə başladı. Ötən qitə birinciliyinə isə yığmanı Vüqar Əliyev aparmışdı. Onunla əlaqə saxlayıb, bəzi məsələlər ətrafında söhbətləşdik.

- Sonuncu, yəni 2021-ci ildəki Avropa çempionatında yığmanın baş məşqçisi siz idiz, nəticə isə ürəkaçan olmadı. Onda komandanın sonuncu yeri tutmasına nə səbəb oldu?
- Düzdü, son turnirdə yaxşı çıxış etmədik. 24 komanda arasında sonuncu olduq. Onda pandemiyadan çıxmışdıq. İki il məşq edə bilməmişdik. Komandanı əvvəlki səviyyəyə gətirmək çox çətin idi. 14 voleybolçudan 9-u orta sahə oyunçusu idi. Qəbuledicimiz yox idi. Hətta o yarışa getməmiş komandanın baş məşqçisi yox idi. Bir sıra mütəxəssislərə təklif etdilər, lakin heç kim bu ağır yükün altına girmək istəmədi. Federasiyaya təşəkkür edirəm ki, mənə bu vəzifəni tapşırdılar. Turnirdən sonra mənim haqqımda mənfi fikirlər söylədilər. Bu mənim özümə də təsir etdi. Amma arzum odu ki, son AÇ-dəki nəticəni bir daha təkrarlamayaq. 

- Ölkə voleybolunun hazırkı durumu sizi qane edirmi? Özünüz də vurğuladız ki, pandemiyadan sonra voleybolda eniş yaşandı. Yeganə səbəb budu?
-  Düzdü, hər şeyi pandemiya ilə əlaqələndirmək yaxşı çıxmaz. Lakin karantin dövrü də ölkə idmanına zərər vurdu. Zallar, stadionlar bağlı oldu, turnirlərə hazırlaşa bilmədik. Bu şeyləri mütəxəssislər başa düşür, ancaq azarkeşlər bizdən yalnız qələbə gözlədiyi üçün tənqidlər də olur.

- Ölkə voleybolunu əvvəlki səviyyəyə gətirmək üçün nələr etmək lazımdı?
- Federasiyanın sabiq prezidenti Cavid Qurbanovun dönəmində çox yaxşı işlər gedirdi. Cavid müəllim ölkə voleyboluna çox xeyir verdi. Buna görə də ona təşəkkür etmək istəyirəm. İndi də Şahin Bağırov bu yolu davam etdirir. O da gənclərə böyük diqqət ayırır. Amma bir məqamı qeyd etmək istəyirəm ki, yerli məşqçilərə diqqət azdı. Bizim gördüyümüz işlər qabardırılmır. Mən 1999-cu ildən məşqçiliyə başlamışam. İlk müəllimim Faiq Qarayev olub. Allah onun canını sağ eləsin. 2002-ci ildə Faiq müəllimlə birgə Avropa kubokunu qazanmışıq. Onda mən 4-cü məşqçi idim. İndiki çalışdırıcılar 5-6-cı məşqçi funksiyasını yerinə yetirir, amma böyük mütəxəssis olmağından danışır. Bizim isə nəticələrimiz göz önündədi. 2006-cı ildə dünya çempionatında baş məşqçinin köməkçisi olmuşam. 2011-də klubla avrokubokları qazanmışıq. 4 dəfə DÇ-də, 10 dəfə AÇ-də iştirak etmişik. Azərbaycanda bu qədər turnirə qatılan idman növü yoxdu. Arzum odu ki, bütün idman növləri üzrə Olimpiya Oyunlarında iştirak edək.

- Əvvəllər güclü komandalarımız var idi. Məsələn, "Rabitə"ni qeyd etmək olar...
- Bu gün bir qurum ölkə voleybolunu idarə edir. Bu da çox çətin durumdu. O zaman "Rabitə"ni nazirlik malliyələşdirirdi. Komandanın əsas heyətində bir yerli voleybolçu çıxış edirdi. O da Natalya Məmmədova idi. “Rabitə” 7 il ölkə çempionu oldu. Bu illər ərzində 6 məşqçi dəyişdilər. Komandanın “oturuşmuş” heyəti var idi. Oyunçular bir-birini çox yaxşı başa düşürdü.  "Azerreyl", "Lokomotiv"  kimi komandaların maliyyə ilə təmin olunan yerləri var idi. İndi isə hər şey fərqlidi. Son vaxtlar Azərbaycan Dəmir Yolları bütün komandalarımıza sponsorluq edir. İstəyərdim ki, əvvəlki sponsorlar qayıtsın, yerli məşqçilərə inansınlar. Eldar Yusubov, Famil Ağayev, Ziya Rəcabov, Emin Əbilov kimi güclü mütəxəssilərimiz var. Onlara inanmaq lazımdı. Federasiya yerli çalışdırıcılara güvənsə, çox gözəl nəticələr əldə edə bilərik.

- Builki ölkə çempionatı barədə nə deyə bilərsiz?
- 6 komanda liqada çıxış edəcək. Legioner limiti də yoxdu. Yeni komanda da yaranıb - Gəncəni təmsil edən "Buta". Baş məşqçi vəzifəsinə məni gətiriblər. Rəhbərliyə mənə inandığı üçün təşəkkür edirəm. İnşallah, azarkeşlərimiz yenidən oyunlarımıza baxmağa gələrlər. 2000-ci ildə "Azərreyl"lə İsrail klubuna qarşı oyunda fanatlarımızın necə çılğınlıq göstərdiyini gördüm. Yadımdadı, o vaxt belə bir söhbət olmuşdu ki, hansısa kənddə işıqlar sönüb və voleybolun finalına baxmaq üçün generator alıblar. İnşallah, belə günlər yenə qayıdar. Şükürlər olsun, federasiya da bununla bağlı ciddi işlər görür. Biz də təcrübəmizlə ölkə voleyboluna xeyir vermək istəyirik. 

CAVİD ƏLİYEV