"Qarabağ"ın HİK-lə oyundakı qələbə topunu Yassin Benzya vurdu. Özü də nə qədər qəribə də olsa, Bədavi Hüseynovun ötürməsindən sonra.

28 yaşlı fransalı yarımmüdafiəçi oyunla bağlı “Football-plus.az”a müsahibə verib.

- HİK-ə qalib gələrək Avropa Liqasının pley-off mərhələsinə vəsiqə qazandız. Təəssüratını öyrənərdik...
- Yaxşı oyun keçirdik. İlk matçdakı bir top fərqi ilə qələbə bizə üstünlük verirdi. Rəqibin azlıqda qalması da işimizi asanlaşdırdı. Qırmızı vərəqəyə səbəb isə təzyiqi artırmağımız oldu. Gözlənilmədən qol buraxdıq, lakin sona kimi mübarizə apardıq. Layiqli şəkildə qələbə qazandıq.

- Rəqib 10 nəfərlə qalsa da, qol vurmaqda çətinlik çəkirdiz. Bunun səbəbi nə idi?
- Bir çoxları elə fikirləşir ki, rəqib azlıqda qalırsa, onun qapısına 4-5 qol vurmaq olar. Biz dəfələrlə şahid olmuşuq ki, meydanda az olan komandanı udmaq çətindi. Həmçinin HİK evdə oynayırdı, ot örtüyü süni idi. Bu amillər də təsir göstərirdi. Buna baxmayaraq, qalib gəldik. Çox xoşbəxtəm.

- Növbəti mərhələdəki rəqibiniz Sloveniya təmsilçisi "Olimpiya”dı. Bu görüş barədə nə deyə bilərsən?
- Hələ ki nəsə deyə bilmərəm. Yalnız adını eşitmişəm. Bütün fikrimizi HİK-lə oyuna yönəltmişdik. Bundan sonra məşqçilərimiz bu kollektiv haqda məlumat toplayacaq.

- Avropadakı hədəfiniz nədi?
- Biz Çempionlar Liqasının qrupuna düşməyi planlamışdıq. Təəssüf ki, alınmadı. İndiki hədəf Avropa Liqasında yolumaza davam etməkdi. Ümid edirəm ki, bu məqsədimizə çatacağıq.

CAVİD ƏLİYEV