"Geniş müzakirə getdi. 2-ci liqada çıxış etmək üçün çox klub müraciət etmişdi. Biz daha çox bölgə klubları önündə “yaşıl işıq yandırılmasında” maraqlıydıq. Müraciət edən klublar arasında stadionu, infrastrukturu minimum standartlara cavab verməyən, həmçinin oynamaq istəyən, amma klub kimi tam formalaşmayanlar da var idi. Sonda "Dinamo" ilə "Şahdağ"ın çıxışına icazə verdik. Hər iki klubun infrastrukturu normal səviyyədədi. Düzdü, "Qusar" hələlik ev oyunlarını Şamaxıda keçirəcək. Amma noyabrda yeni stadion qusarlıların sərəncamına veriləcək. Bunun da nəticəsində Qusarda böyük futbol dirçələcək. İclas zamanı bizi qınayanlarda oldu ki, "Şahdağ"ın çıxışına icazə verilməsi məntiqli deyil. Çünki ötən mövsüm Region Liqasında qalib olan "Qusar"ın artıq 2-ci liqada çıxışına icazə verilib. Amma biz həm infrastruktur, həm də “Mançester Yunayted”lə “Mançester Siti” misalını gətirdik. Bundan sonra da 2-ci liqada maksimum çox komandanın çıxışına şərait yaradacağıq. 2-ci liqa infrastruktur problemi olmayan istənilən klubun üzünə açıqdı. Düşünürəm ki, yeni liqada daha çox bölgə təmsilçisinin yer alması futbolumuza müsbət təkanlar verəcək".