Bu gün AFFA-nın inzibati binasında İcraiyyə Komitəsinin növbəti iclası keçirilib.

"Football-plus.az" xəbər verir ki, toplantıdan sonra qurumun baş katibi Sərxan Hacıyev jurnalistlərin suallarını cavablandırıb.

- İcraiyyə Komitəsinin iclasında müzakirə olunmuş məsələlər haqda danışarıdız…
- Əsas məsələ ikinci liqada çıxış edən klubların sayı ilə bağlı idi. Artıq komandaların sayı 12-dən 14-ə yüksəldi. Bu müddət ərzində bir sıra klublar həm PFL-ə, həm də AFFA-ya çempionatda iştirakla bağlı müraciət etmişdi. Rəsmilər də müraciət edən klubların sənədləri ilə stadionları ilə maraqlanmışdı. Son qərara əsasən “Dinamo” (Bakı) ilə “Şahdağ”ın (Qusar) 2-ci liqada çıxış etməsi dəqiqləşdi. Bilirsiz ki, daha əvvələr də “Dinamo” ölkə futbolunda var idi. “Şahdağ” isə bizə təminat verdi ki, noyabrın sonuna kimi ev oyunlarını keçirdiyi arenanın təmiri başa çatacaq. Artıq arenanın böyük hissəsi də hazırdı. Xoş məqam odu ki, stadion iinvestor tərəfindən inşa olunur. “Dinamo”ya gəlincə, son vaxtlar milli komandalarda çıxış edən bəzi futbolçular hərbi xidmətlə bağlı problemlər yaşayırlar. Oyunçularımızın yaxşı səviyyədə qalması “Dinamo”da çıxış etmələrinə imkan yaradılacaq. Bu məsələdə MOİK də var, ancaq bir sıra prespektivli futbolçular bu komandada çıxış edə bilmirlər. Buna görə də “Dinamo”nun 2-ci liqada mübarizə aparması qərarı təsdiqləndi. Tarixi olan klubdu. Ötən əsrin 90-cı illərində ölkə çempionatında çıxış edib.

- Bəs “Şahdağ” noyabrın sonuna kimi ev oyunlarını harda keçirəcək?
- Şamaxı Olimpiya Stadionunda. Artıq PFL rəsmiləri də arena ilə tanış olub. “Dinamo”nun ev oyunlarını keçirəcəyi stadionla bağlı tam dəqiq söz deyə bilmərəm. Lakin Bakı ərazsisində və standartlara cavab veren arena olacaq.

- İcraiyyə Komitəsinin iclasında başqa hansı məsələlər haqda söhbət oldu?
- Stadionlarla bağlı məsələ müzakirə olundu. Çünki bəzi arenaların vəziyyəti ürəkaçan deyil. Elə stadionlar var ki, onların dam örütüyündə problemlər var. Bununla bağlı planlarımız olacaq.

- “Çinar” və “Göyəzən də 2-ci liqada oynamaq üçün müraciət etmişdi. Bəs bu klublarda hansı çatışmazlıqlar oldu?
- 2-ci liqada çıxış edəcək komandalar arasında seçim imkanımız var idi. Amma azarkeşlər, media və klub rəhbərləri bizi anlasınlar ki, bu yeni yaranan liqadı və burda idman prinsipləri yoxdu. Komandaların yeni mövsümdə çıxış etmək üçün şəraiti olmalıdı. Əsas məsələ infrastukturdu.

- Sonda avrokuboklarda mübarizə aparan komandalarımız haqda fikir bildirərdiz.
- Ötən həftə üç klubumuz Bakıda oynadı. Sevindirici hal budu ki, ikisi qələbə qazandı. “Neftçi”nin rəqibi isə çətin komandadı. “Beşiktaş” Türkiyənin sayılıb-seçilən kollektivlərindən biridi. “Ağ-qaralar” birinci qarşılaşmanın ikinci yarısında yaxşı mübarizə apardılar. İnanıram ki İstanbulda da komandamızdan gözəl oyun görərik. Bütün təmsilçilərimizə uğurlar arzulayıram. Fürsətdən istifadə edib bunu da bildirmək istəyirəm ki, Bakıda bir gündə keçirilən üç avrokubok matçının təşkilatçılığı yüksək səviyyədə idi. Bunun üçün həm klublar, həm də dövlət orqanları layiqincə iş aparılmışdı. Biz də AFFA olaraq, onlara təşəkkürümüzü bildirik. Əsas da Daxili İşlər Nazirliyinə.

CAVİD ƏLİYEV