Dünən premyer-liqanın 2-ci turunda “Səbail”lə qarşılaşan “Neftçi” bu gün İstanbula yola düşəcək.

"Football-plus.az" xəbər verir ki, komanda saat 17.00-da Türkiyəyə yollanacaq. "Ağ-qaralar" İstanbuldakı “The Ritz-Charlton Hotel”də məskunlaşacaq.

Flaqmanda bəzi oyunçularla bağlı narazılıq hökm sürür. Söhbət Azər Salahlı ilə Kenni Sayefdən gedir. “Ağ-qaralar”ın rəhbərliyi bu oyunçuları əvəz edəcək futbolçur axtarışındadı. Fərrux Mahmudovun açıqlamasına inansaq, Bakı təmsilçisi “transfer pəncərəsi”ndə dövründə daha 5 futbolçu ilə danışıqlar aparılır. Əldə etdiyimiz məlumata görə, klub rəhbərliyi sol cinah müdafiəçisi, yarımmüdafiəçi, oyun qurucusu, sağ vinger və hücumçu axtarışındadı. Mutu əsasən Azər Salahlının yerinə yeni transfer edilməsini istəyib.

Bu arada həm Rusiyadakı təlim-məşq toplanışında, həm də avrokuboklarda özünü yaxşı tərəfdən göstərən Kilan Libon diqqət mərkəzinə düşüb. Fransalı vingerlə Rusiya və Türkiyə klubları yaxından maraqlanır. Lakin o, “Neftçi”də qalmaq niyyətindədi. Maraq üçün bildirək ki, 26 yaşlı oyunçunun flaqmanla 2024-cü ilin iyununa kimi müqaviləsi var. Klub rəhbərliyi fransalı ilə qış fasiləsində yeni müqavilə bağlamaqla üçün masa arxasında oturacaq.
Yeri gəlmişkən, baş məşqçi Adrian Mutunun seçimi və təqdimatı əsasında “Neftçi”nin məşqçilər korpusuna daha bir təyinat olub. Təcrübəli mütəxəssis Sənan Qurbanov köməkçi məşqçi təyin edilib. Onunla iki illik müqavilə bağlanıb.

Sənan Qurbanov 1980-ci il avqustun 4-də anadan olub. Futbolçu kimi ölkəmizdə bir çox klubun, eləcə də Azərbaycan milli komandasının formasını geyib, 2012-ci ildə məşqçiliyə başlayıb. 2018-ci ilədək “Qəbələ”də məşqçi, 2018-19-cu illərdə isə baş məşqçi vəzifəsində çalışmış 43 yaşlı mütəxəssis 2021-22 illərdə “Keşlə”ni (indiki “Şamaxı”) çalışdırıb. O, 2018/19 mövsümündə “Qəbələ”yə, 2020/21-də isə “Keşlə”yə ölkə kubokunu qazandırıb.
Xatırladaq ki, Mutunun digər köməkçiləri, məşqçilər korpusunun üzvləri köməkçi məşqçi Alin-Nikolaye Çita, analitik məşqçi Aurelian-Boqdan Patraşku, fiziki hazırlıq üzrə məşqçi Miodraq Todorov və qapıçılar üzrə məşqçi Mihai-Qavril Nedebandı.