"Football-plus.az" xəbər verir ki, bu sözləri "Qarabağ"ın baş məşqçisi Qurban Qurbanov Misli premyer-liqasının 2-ci turunun "Turan Tovuz"la(3:0) görüşündən sonra keçirilən mətbuat konfransında deyib. O, jurnalistlərin suallarını cavablandırıb.

- Sizcə, oyunu daha gec saata təyin etmək olmazdı? Onsuzda, "Sumqayıt" - "Sabah" görüşü təxirə salınmışdı...
- Çox isti idi, futbolçular əziyyət çəkdi. Bəlkə biz də PFL-ə müraciət etsəydik, yox deməzdilər. Sadəcə digər oyunun təxirə salındığı iki günün içərisində bilindi. Ola bilər ki, heç birimizin ağlına gəlmədi, bu barədə düşünmədik. Məncə, müraciət etsəydik, yox deməzdilər. Xeyirlisi.

- Avropa Liqasındakı rəqibiniz olan "Helsinki"ni Bakıda gördünüz, daha yaxından tanıdınız. Onların zəif və güclü tərəfləri barədə nə deyərdiz?
- Hələ ki, çox açıqlama verməyim düzgün olmaz. Bir komanda haqda ancaq pozitiv fikirlərim olur. "Helsinki" yaxşı komandadı. Həmişə demişəm ki, bir komandanın, məşqçinin öz oyun sistemi varsa, bunu yaxşı yerinə yetirirlərsə, deməli, onlar sabitdi. Finlandiya klubu da onların içərisindədi. Onlar öz oyun sistemlərini yaxşı icra edirlər, illərdi bunu qoruyub-saxlayırlar, futbolçular bir-birilərini yaxşı tamamlayırlar. "Helsinki"ni Bakıdakı oyunda daha yaxından tanıdıq. Bizi xeyli yordular. Bakıdakı matçda bəzi çatışmazlıqlarımız var idi. Çalışacağıq ki, səfərdəki oyunda bunları aradan qaldırıb, oyunun gedişatında daha diqqətli, daha aktiv olaq. Böyük ehtimalla "Helsinki"yə qarşı Finlandiyada daha çox güc sərf etməliyik. Çünki bu komanda çempionatın ortasındadır. İdman formaları yerindədir. Maksimum hücumda oynamağa çalışacağıq. Yaxşı hazırlaşacağıq. Ola bilsin ki, "Helsinki" sürpriz etsin, riskə getsin. Maraqlı görüş olacaq.

- "Qarabağ" növbəti transferi reallaşdıracaq?

- Ola bilər. Bir neçə oyunçu var ki, danışıqlar gedir. Mövqeyə gəlincə, istənilən yer olması mümkündü.

- Çili mətbuat yazmışdı ki, "Qarabağ" "Kolo-Kolo"nun vingeri ilə maraqlanır. Doğrudur?

- Çox oyunçu ilə maraqlanmışıq. Ola bilər ki, transfer siyahımızda onun da adı var. Amma dəqiq məlumat verə bilmərəm.

- "Helsinki" ilə cavab görüşünün süni örtüklü meydanda keçirilməsi komandaya mənfi təsir edəcək?
- Təbii örtüklü meydanda oynamaq bizim üçün daha rahat, daha asan, daha maraqlıdır. Başqa sürət olur, futbolçular daha güvənli oynayırlar. Hansısa problemlərimiz olacaq, amma o barədə düşünmürük. Azərbaycanda da belə meydançalarda oynamışıq. Hər halda, təbii örtüklü meydanda oynasaq daha yaxşı idi. Futbolçularımız süni örtüklü meydanda daha diqqətli olmalıdı.