"Mikels hələ də "Sabah"a məxsusdu və hazırda Bakıdadı”
"Sabah"ın almaniyalı ulduzu Coy-Lens Mikelslə bağlı məsələ hələ də açıq qalır.
Futbolçunun Səudiyyə Ərəbistanı klubuna keçəcəyi ilə bağlı xəbərlər dolaşsa da, bizdə olan bilgiyə görə, futbolçu rəsmi şəkildə hələ də "Sabah"a məxsusdu. Bu məsələylə bağlı daha detallı bilgi almaq üçün "bayquşlar"ın mətbuat katibi Elnur Həmidova müraciət etdik:
"Mikels hələ də "Sabah"a məxsusdu və hazırda Bakıdadı. Almaniyalının müqaviləsində qeyd olunan bəndlə bağlı ödəniş olunsa, rəsmən klubumuzdan ayrılacaq. Amma hazırda nə hansısa klub, nə də futbolçu özü məbləği ödəyib. Yollarımızı ayrımaq məsələsinə gəlincə, bu vaxta kimi klubumuzda heç bir futbolçuyla müqaviləyə dava-dalaş, münaqişə, qarşıdurma ilə xitam verməmişik. Hər bir oyunçuya xidmətlərinə görə təşəkkürmüzü bildirmişik. Mikels də gedəcəyi təqdirdə ona minnətdarlığımızı bildirəcəyik".
Maraqlıdı ki, "Sabah"ın Müşahidə Şurasının üzvü və idman direktoru İqor Ponomaryov qəzetimizə tam fərqli açıqlama verdi:
"Mikels haqqında yeganə bildiyim onun artıq klubumuzun üzvü olmamasıdı. Futbolçu "Sabah"da deyil".
ABDULLA İSMAYILOĞLU
