“Neftçi" Konfrans Liqasının 3-cü təsnifat mərhələsinin ilk oyununda "Beşiktaş"a uduzmaqla növbəti mərhələyə adlamaq şansını azaltdı. Bakılılıarın baş məşqçisi Adrian Mutu oyundan sonra belə dedi:

- Meydana buraxdığınız ilk "11-lik"də səhv etdiyinizi düşünürsüz? Çünki fasilədən sonra komanda yaxşı oynamağa başladı...
- Start heyətində yanıldığımızı düşünmürəm. Əlimdəki futbolçulara uyğun heyət qurmuşdum. Aaron Olanare dünən komandaya qoşulub və bu gün meydana çıxdı. Olanare heç 30 faiz hazır deyil. Ervin Koffi zədəli oldu və son üç gündə komandayla məşq edirdi. Eddi İsrafilov, Ömər Buludov zədəlidi. Hansı oyunçular hazır idi, onları da oynatmağa çalışdım. Belə rəqiblərə qarşı oynayanda daha çox qaçmalı olursan ki, oyunda qala biləsən. Məqsədlərimizdən biri də o idi ki, yeni oyunçuları ikinci hissədə meydana buraxım və daha yaxşı fiziki formaya düşsünlər. Ən yaxşı məşq oyundu. İnanın ki, ikinci hissədə bəzi oyunçuları 45 dəqiqə meydanda oynatmağa məcbur idim. Digər tərəfdən də zədə alacaqlarından qorxurdum. Şükürlər olsun, zədə olmadı və bu da bizim üçün yaxşı oldu.

- Bu oyun göstərdi ki, "Beşiktaş"a qarşı oynamaq olar. Səfərdə nəyə ümid edəcəksiz?
- İstanbuldakı oyuna bir həftə var. İndidən nəsə demək çətindi. Yeni komanda formalaşdırırırıq. Bu gün gördüyünüz heyət qurmaq istədiyim komandanın 30 faizidi. Çalışırıq ki, oyunçular transfer edək, gələnləri də yaxşı fiziki duruma gətirib çıxaraq. Qarşıdakı matçlarda seçimlərimizdə diqqətli olmalıyıq. Çünki üç gündən bir oynamaq komandaya ziyan da verə bilər. Oyunçuların zədələnmək ehtimalı olur. Bizim üçün İstanbuldakı oyun vacib olacaq. Ora gedəndə yalnız qələbə haqda düşünəcəyik. İstanbula qalib gəlmək üçün gedəcəyik.

- Oyun Bakıda keçirilsə də, "Beşiktaş"ı dəstəkləyən azarkeşlər də az deyildi. Bu, "Neftçi"yə mənfi təsir etdimi?
- İlk yarıda emosionallıq çox idi. Deməzdim ki, "Beşiktaş" azarkeşlərini eşidirdim, yalnız "Neftçi" azarkeşlərini eşidirdim. İkinci hissədə oyunçularımın oyunundan çox xoşum gəldi, sona qədər oynadılar, mübarizə apardılar. Onlardan razı qaldım.

- Azər Salahlı ilk hissədə çoxlu səhvə yol verdi. Müdafiənin sol cinahındakı vəziyyət sizi narhat edir?
- Düzgün qeyd etdiz, rəqib sol cinahdan hücumlar edirdi. Biz də bunu görüb dəyişiklik etdik. Bu da komandanın xeyrinə oldu. Kenni Sayef həmin mövqedə çox yaxşı çıxış etdi. Emini də məcburən daha arxaya çəkməli olduq ki, təcrübəsində istifadə edək. Fərid Yusifli də ilk hissə pis oynamadı, hələ gəncdi, təcrübəsizdi. Ola bilsin ki, oyunboyu emosiyalara qapılmışdı. Olanareni oyuna salmaqla bir az riskə də getdim. Amma o mövqeyə elə oyunçu lazım idi ki, gələn topları saxlasın, topu itirməyək. Hər zaman qələbə qazanmaq istəyirəm. İstəməzdim ki, uduzaq. Ancaq qarşıdakı matçları da düşünməliyik. Çempionatı da düşünmək lazımdı. Qarşımıza böyük məqsədlər qoyulub. İndi fikirləşmək lazımdı ki, qarşıdakı matçlara necə hazırlaşaq.

- "Neftçi" niyə bu qədər müdafiəyə çəkilmişdi? Çünki hər üç qolu müdafiənin səhvindən buraxdız...
- Üçüncü qol haqda danışmalı deyilik. Bu səhvi hamı gördü. Deyim ki, futbolçular bütün oyunboyu səhvsiz oynayacaq, düz olmaz. Çünki qarşımızda çox güclü komanda, yaxşı oyunçular oynayırdı. Qarşımızda "Beşiktaş" kimi rəqib var idi. Bəzən elə məqamlar var ki, qarşıdakı rəqibin gücünü qəbul etməlisən. Bu axşam buraxdığımız qolları təhlil edəcəm. Müdafiədə boşluqlar verdik, onların üzərində işləyəcəyik. Rəqib bunlardan istifadə etdi.

CAVİD ƏLİYEV