“Neftçi" sabah Konfrans Liqasının 3-cü təsnifat mərhələsinin ilk oyununda "Beşiktaş"ı qəbul edəcək.

Bu gün "ağ-qaralar"ın çalışdırıcısı Adrian Mutu və futbolçusu Filip Ozobiç media nümayəndələrinin önünə çıxdı.

Əvvəlcə xorvatiyalı yarımmüdafiəçi matçla bağlı fikirlərini bölüşdü:

Ardından rumıniyalı çalışdırıcı Adrian Mutu oyunla bağlı danışdı:



- "Kəpəz"lə matçdan sonra demişdiz ki, üç gündən bir oynamağa hazır deyilik. Sabah komanda meydanda yüz faizini qoysa, sərfəli nəticə əldə olunacaq?
- Bunu komandanın fiziki durumunu nəzərə alıb demişdim. Üç gündən bir oynamaq üçün geniş heyət olmalıdı. "Kəpəz"lə oyunda komanda yüz faizini verməyə çalışdı. Yorğunluğa baxmayaraq, həmin matçda qələbə qazanmalıydıq. Yorğunluğu bəhanə etmirik.

- Müdafiənin mərkəzinə tanıdığınız futbolçuları transfer etmisiniz. Sağ cinaha da Ervin Koffi alınıb. Sol cinaha müdafiəçi transferi gözlənilir?
- Təəssüf ki, Koffi ilk oyunda zədələndi. Bir neçə futbolçu ilə danışıqlar gedir. Hər mövqedə rəqabətin artması üçün çalışacağıq. Bu, komandanın xeyrinə olacaq. Ölkə çempionatındakı yerli limitini də nəzərə almaq lazımdı. Çalışırıq ki, kənardan proqnozlaşdırılmış komanda kimi görünməyək.

- "Neftçi"nin hücumçu transferində gecikdiyini düşünmürsüz?
- Düz qeyd etdiz, bir az gecikirik. Amma bir neçə oyunçu ilə danışıqlar gedir. Çətinliklər var. Buna baxmayaraq, həmin mövqeyə yaxşı futbolçu transfer etmək istəyirik.

- "Neftçi" yeni komandadı, yeni baş məşqçi təyin olunub. Sanki siz rəqib üçün "sirli qutu"suz. Bu, sizin üçün üstünlükdü?
- Düzü, bilmirəm necə cavab verim. "Beşiktaş"ın necə kommanda olduğunu bilirik, onlar Türkiyənin böyük komandasıdı, biz də öz ölkəmizin. Avropa arenasında belə oyunlarda hər şey baş verə bilər.

- Premyer-liqaya məğlubiyyətlə başladız. Bu, sabah mütləq qalib gəlməli olan komandanın üzərində təzyiq yaradır?
- Hər məğlubiyyət komandanın üzərində təzyiq yaradır. Biz "Neftçi"yik. Məğlubiyyətin təzyiq yaratması normaldı. Azarkeşlər başa düşməlidir ki, biz güclü komanda qurmaq istəyirik. Hazırkı "Neftçi" mənim istədiyimin 60 faizi deyil. Transferlərdə bir az gecikmələr oldu. Bir az da bəxtsizlik yaşadıq. Ömər Buludov, Eddi İsrafilov zədələndi. Onlar komandaya kömək edə bilməyəcəklər. Hamıdan səbirli olmağı xahiş edirəm. Daha güclü "Neftçi" quracağıq.

- Sabah üçlü, yoxsa dördlü müdafiə sistemi ilə oynayacaqsız?
- Bu suala cavab verməyəcəm. Sabah görəcəksiz.

- Azarkeşlərin sizdən gözləntiləri böyükdü. Bəs sizin onlardan gözləntiniz nədi?
- Bilirəm ki, azarkeşlərin bizdən gözləntisi çoxdu. Amma eyni anda da bir az realist olmalıyıq. "Beşiktaş"la matçda əlimizdən gələni edəcəyik ki, qələbə qazanaq. Reallığa baxsaq, "Neftçi" hazırda qurulma dönəmində olan komandadı. Biz də istəyirik ki, hər oyunda qələbə qazanaq. Səbirli olmalı və vəziyyətə real baxmalıyıq.

- 2003-cü ildə futbolçu kimi "Beşiktaş"a qarşı oynamısız. Sabahkı matça qisas imkanı kimi baxırsız?
- Niyə qisas? Həmin matçda mən qol vurdum və biz növbəti mərhələyə adladıq. Onlar bizdən qisas almalıdı.

- Bəzi rumıniyalı futbolçuların adı "Neftçi" ilə hallanır. Bunlardan hansı doğru xəbərdi?
- Rumıniyadan cəmi iki oyunçu gətirmişəm. Hazırda sırf Rumıniya bazarına nəzər yetirmirəm. Mənim üçün əsas odu ki, götürdüyümüz futbolçu "Neftçi"yə faydalı olsun.

- Sabah digər təmsilçilərimiz "Sabah" və "Qarabağ" da avrokubok matçına çıxacaq. Bu, sizin üçün Qurban Qurbanov və Murad Musayevlə rəqabət yaratmaq baxımından nə dərəcədə önəmlidi?
- Onlarla rəqabət mənim üçün o qədər də vacib deyil. Azərbaycan üçün vacibdi ki, Avropada yaxşı nəticələr olsun. Fürsətdən istifadə edib çempionatı təşkil edən qurumdan xahiş edirəm ki, avrokubok oyunlarımızı da nəzərə alsınlar və biz də həmin matçlarda daha enerjili olaq, Avropada uğurlu çıxış edək. Avropada uğurlu olmaq istəyiriksə, istirahətə də bir qədər vaxt ayırmaq lazımdı.

CAVİD ƏLİYEV