Millimizin üzvü, “Qarabağ”ın sabiq futbolçusu Musa Qurbanlı iyulun əvvəlində “Yurqorden”ə transfer olundu.

Gənc futbolçu İsveç klubu ilə 3 illik müqavilə imzaladı. 4 oyunda (İsveç çempionatında 2, Konfrans Liqasında 2) meydana çıxan hücumçu hələ ki nə məhsuldar ötürmə verib, nə də qol vurub. “Yurqorden” isə avrokuboklardakı ilk mərhələdə İsveçrə “Lütsern”inə məğlub olmaqla (ümumi hesab – 1:3) mübarizəni dayandırıb.

"Football-plus.az" xəbər verir ki, Musa srağagün məşqdən sonra İsveçin məşhur “Forum 1891” nəşrinin suallarını cavablayıb. Müsahibəni oxucularımıza təqdim edirik.

- Yüksək gözləntilərə baxmayaraq, azarkeşləri sevindirə bilməmisən. Onlar səndən qol partlayışı gözləyir...
- Məşqlərdə çox çalışıram. İsveç futbolu daha fərqlidi. Düzgün formamı tapmaq üçün daha bir neçə matçda iştirak etməliyəm. Bura uyğunlaşmaq zaman alacaq. Narahat deyiləm. Yaxşı işlər görəcəyimə inanıram.

- “Yurqorden” tərəfdarları ən yaxşı formanı görmək üçün səbirsizlənir. Buna nə vaxt nail olacaqlar?
- İsveç çempionatında mövsümün ortasıdı. Mən isə Azərbaycandan yay fasiləsində gəlmişəm. Burdakı oyunçular daha hazır formadadı. Üstəlik müqavilə bağladıqdan sonra Bakıya qayıtdığım üçün 10 gün məşqlərdən yayındım. Azarkeşlər mənə vaxt versinlər. Üzərimdə işləyirəm ki, hədəfə daha tez çatım.

- Baş məşqçi dəfələrlə sənə güvəndiyini deyib. Riskli olsa da, Konfrans Liqasında şans verdi ki, özünü sübut edəsən. Lakin bu dəfə də alınmadı. Üstəlik “Yurqorden” məğlub oldu...
- Mərhələni adlamağı çox istəyirdik. Təəssüf ki, bacarmadıq. “Lütsern”lə matç çox çətin keçdi. Daha yaxşı oynaya bilərdim. Ümumiyyətlə, performansımdan razı qalmağı xoşlamıram. Azərbaycan premyer-liqasında bir matçda 1-dən çox qol vurduğum hallarda belə özümü xoşbəxt hiss etmirdim. Çünki həmişə daha yaxşısını etmək istəyirəm.

- Növbəti plan nədi?
- Bazar günü “Göteborq”la matç var. Bu oyuna ciddi hazırlaşırıq. Səfər qarşılaşması olduğu üçün yükümüz ağırdı. Hazırda rəqibi təhlil edirəm ki, necə oynamalı olduğumu bilim.

- “Yurqorden”də bir neçə bacarıqlı hücumçu var. Səni güclülərlə rəqabət gözləyir. Start heyətində yer almaq çətin olacaq...
- Rəqabətdən qorxmuram, əksinə, xoşuma gəlir. Oyunçu kimi inkişaf etməyin daha rahat yolu yoxdu. İşim ən yaxşı şəkildə çıxış etməyə fokuslanmaqdı. Bu həm də komanda kimi formalaşmağa kömək edəcək.

- Bir aydı Stokholmdasan. Özünü necə hiss edirsən? Bilirsən ki, buranın ab-havası qəribədi. Yeni gələnlərin əksəriyyəti üçün uyğunlaşmaq çətin olur.
- Elə düşünmürəm. İsveçi sevirəm. Xüsusilə Stokholmun havası şox yaxşıdı. Yağışlı günlərdən zövq alıram. Azərbaycanda belə deyil. Bu ərəfələr 40 dərəcəyə qədər isti olur. Ancaq qışdan qorxuram (gülür). Eşitmişəm ki, burda qış ayları çox soyuq olur. Eybi yox, hər halda, dözə biləcəm. Əsas insanların davranış tərzidi. Yaxşı ki, burda hər kəs mehriban və səmimidi. Qonaqpərvər adamların gülüşündən həzz alıram...

- “Yurqorden” azarkeşləri gündəlik həyatınla maraqlanır. Boş vaxtlarını necə dəyərləndirirsən?
- Məşqdən sonra dincəlməyə və heç bir şey etməməyə çalışıram. Daha sonra sağlamlığıma faydalı olacaq işlərlə məşğul oluram. Bəzən şəhəri gəzirəm. Qəhvə içmək və alış-veriş etmək məni rahatlaşdırır. Məncə, gündəlik həyatım başqa insanların etdiklərindən fərqli deyil. Sadəliyə üstünlük verirəm.

KƏNAN BAHADIR