"Qarabağ" Avropa Liqasının 3-cü təsnifat mərhələsində qarşılaşacağı HİK-lə görüşün hazırlığına bu gün başlayacaq.

"Football-plus.az" xəbər verir ki, "köhlən atlar" məşqlərini "Azərsun Arena"da keçirir.

Bu arada Helsinki təmsilçisinin Bakıya gələcəyi tarix bəlli olub. Finlandiyalılar avqustun 9-u saat 16.25-də paytaxtımızda olacaq. Helsinki təmsilçisi "Boulvard Marriot Hotel"də məskunlaşacaq. Rəqib komandanın azarkeşinin Bakıya mümkün səfəri ilə bağlı "Qarabağ"a hansısa məlumat verilməyib.

Ağdamlıların heyətində Marko Veşoviçlə Abbas Hüseynov zədələdi. Onların heç biri HİK-lə görüşdə meydana çıxmayacaq. Monteneqrolu 2-3 həftə sonra tam sağalacaq. Abbasın isə durumu ciddidi. Düzdü, milli üzvü Avstriyadakı təlim-məşq toplanışında fərdi məşqlər keçirdi. Amma Abbas zədəsini hələ də tam sağaltmayıb. Ola bilər ki, sentyabrdan komanda ilə birgə məşqlərə qoşulsun. Həkimlər müdafiəçinin zədəsi ilə bağlı ehtiyatlı olmağı tapşırıb. Bu səbəbdən də Qurban Qurbanov Abbasın tam sağalmasını gözləyir.
"Qarabağ" - HİK oyununun biletləri avqustun 5-i saat 14.00-dan satışa çıxarılıb. Biletlərin qiyməti sektordan asılı olaraq, 5, 10, 20, 30, 75 və 100 manat təşkil edir. VVIP C və VVIP D sektorlara bilet alaraq, VIP Lounge üstünlüklərindən yararlanmaq istəyən azarkeşlər üçün biletlərin qiyməti isə 200 manatdı.

Yeri gəlmişkən, HİK iştirak ərizəsini UEFA-ya təqdim edib. Helsinki təmsilçisi 24 futbolçu sifariş edib: qapıçılar - 1. Yesse Est, 85. Niki Myaenpyaya; müdafiəçilər - 2. Tuomas Ollila, 3. Nikolas Hyamyalyaynen, 4. Yoona Toyvio, 5. Kristofer Da Qrasa, 6. Aapo Halme, 15. Miro Tenho, 22. Yukka Raytala, 27. Kevin Kuassivi-Benissan; yarımmüdafiəçilər - 8. Filip Roqiç, 10. Lukas Linqman, 14. Matti Peltola, 18. Topi Keskinen, 19. Aleksi Paananen, 23. Pyuryu Soyri, 24. Georgios Kanellopulos, 34. Maksim Styopin, 56. Perparim Hetemay; hücumçular - 7. Santeri Hostikka, 9. Boyan Raduloviç, 11. Roope Riski, 29. Entoni Olusanya, 37. Atomu Tanaka.
HİK həftəsonu ölkə çempionatında 19-cu tur oyununa çıxıb. Komanda "İFK Maryehamn"ı qəbul edib və 4:2 hesabıyla qalib gəlib. Bu qələbə ilə xalını 37-yə çatdıran HİK turnir cədvəlinin 1-ci pilləsində qərarlaşıb.

İLKİN SULTANLI