“Uşaq və gənclərin fiziki və mənəvi inkişafı” istiqaməti üzrə layihə çərçivəsində yazılarımız davam edir.

Budəfəki müsahibimiz də yeniyetmə və gənclərə güləşin sirlərini öyrədən mütəxəssisdi. Düşünürük ki, Azərbaycan idmanı üçün çempionlar yetişdirən mütəxəssisləri daha yaxından tanımağa, onların fikirləri ilə tanış olmağa böyük ehtiyac var. Azər Hüseynov Binə qəsəbəsində güləşçilər yetişdirir, Azərbaycan idmanına töhfə verməyə çalışır. Onunla söhbətə adətimiz üzrə keçmişə körpü salmaqla, yəni güləşlə məşğul olmağa necə başlamasını soruşmaqla başladıq. Söhbətin davamında isə həm güləşimizin indiki vəziyyətinə, həm də hazırkı güləşçilərin problemlərinə toxunduq.



- Azər bəy, layihəmizin ənənəsinə uyğun olaraq sizə ilk sualı güləşə gəlişinizlə bağlı veririk. Keçmişə səyahət edək. Güləşə ilk addımlarınızı harda, kimin rəhbərliyi altında atmısız?
- Mənim üçün keçmişə səyahət etmək həmişə xoşdu. Çünki o günləri xatırlayanda həmin o xoş hissləri yenidən yaşamış oluram. 1978-ci ildə, Bakı şəhərində doğulmuşam. Daha dəqiq desəm, Xəzər rayonunun Binə qəsəbəsində. O vaxtlar uşaqların, yeniyetmələrin idmana böyük marağı vardı. Xüsusən də güləş kimi bizim milli idman növünə. Mən də 10 yaşımdan güləşlə məşğul olmağa başlamışam. “Neftçi” İdman Cəmiyyətində Əliqulu Həsənov ilk müəllimimiz idi. Məhz onun rəhbərliyi altında güləşə ilk addımlarımı atdım, bu idman növünün incəliklərini öyrənməyə başladım. Müxtəlif turnirlərin, respublika birinciliyinin qalibi olmuşam. Qazandığım belə mükafatların sayı çoxdu. Bu idman növünü seçməyim də səbəbsiz olmayıb. Qonşuluqda yaşayan məndən yaşca böyük uşaqlar güləş məşqlərinə gedirdilər. Mən də onlara dedim ki, sizlə getmək istəyirəm. Etiraz etmədilər. Bir neçə dəfə məşqlərə qatılandan sonra gördüm ki, güləşə bağlanıram, onu sevməyə başlayıram. Beləcə güləşlə daha böyük istəklə məşğul olmağa, yarışlara qatılmağa başladım.



- Bəs məşqçilik fəaliyyətinə necə başladız?
- 10 yaşımdan güləşlə məşğul olmağa necə başlamışamsa, o vaxtdan da elə idmanın içindəyəm. 1996-cı ildə İdman Akademiyasına qəbul olundum. 2000-ci ildə isə həmin akademiyanı bitirdim. Bundan üç il sonra isə “Təhsil” idman məktəbində məşqçiliyə başladım. O vaxtdan bəri də mənə doğma olan Binə qəsəbəsində məşqçi kimi fəaliyyətimə davam edirəm.



- Artıq bir mütəxəssis kimi bilik-bacarıqlarınızı yetirmələrinizə öyrədirsiz. Onların məşqlərə yanaşması sizi qane edirmi? Yetirmələrinizin hansı uğurlarını qeyd etmək istərdiz?
- Səmimi sözümdü ki, indiki uşaqlar məşqlərə çox ciddi, ürəklə yanaşırlar. Sanki hər yarışda qələbə qazanmaq istəyirlər. Bunun üçün səylə məşq edir, həvəslə öyrənirlər. 77 kiloqram çəki dərəcəsində Sənan Süleymanov böyüklər arasında Avropa çempionudu, dünya çempionatının isə gümüş medalını qazanıb. Bir yetirməm kimi onunla fəxr edirəm. Bir çox beynəlxalq yarışın qalibi adını qazanıb, bayrağımızı yüksəldib, himnimizi səsləndirib. Orxan Nuriyev isə gənclər arasında həm Avropa, həm də dünya çempionu olmağı bacarıb. Orxan da bir çox beynəlxalq turnirlərdə sözünü deyib. O cümlədən də İslam Həmrəyliyi Oyunlarının qalibi olub. Belə istedadlı, əzmkar idmançılarımızın sayı çoxdu. Gələcəkdə də belə idmançılarımızın bizi sevindirəcəyinə əminəm.



- Azər müəllim, sözsüz, zaman yerində dayanmır. Zaman keçdikcə həyatımızda müxtəlif yeniliklər görürük. Bu dəyişikliklərin güləşə təsiri necədi? Qaydalarda, yaxud da məşq prosesində hansısa yeniliklər olurmu?
- Qaydalarda zaman-zaman müəyyən dəyişikliklər olur. Bu barədə də Azərbaycan Güləş Federasiyası biz məşqçiləri müntəzəm məlumatlandırır. Prinsipcə ciddi dəyişikliklər olmur. Sadə dillə desəm, güləş elə həminki[/b] güləşdi. Amma yenə də müəyyən nüanslar olur ki, federasiyadan bizə məlumat gələn kimi onu nəzərə alırıq. Güləş öz axarı ilə gedir, bir qədər təkmilləşir. Əsasən də qaydalarda müəyyən yeniliklər baş verir. Fəndlər isə yerindədi. Tələbələrə qaydaları izah edərkən bu dəyişiklikləri onların nəzərinə çatdırırıq ki, yarışlarda bunu nəzərə alsınlar. Bu sahədə elə bir ciddi əngəlimiz yoxdu.

- Son sualım güləşimizin mövcud durumu, daha doğrusu, problemləri ilə bağlıdı. Bir məşqçi kimi sizi narahat edən hansısa problemlər varmı?
- Problemlər olsa belə, onlar qısa müddətdə həll edilir. Əminliklə demək olar ki, biz mütəxəssislər və idmançılar Azərbaycan Güləş Federasiyasının tam diqqət və qayğısıyla əhatə olunmuşuq. Bizim üçün gözəl şərait yaradılıb. Başda ölkə başçısı cənab İlham Əliyev olmaqda federasiya rəhbərliyinə buna görə minnətdarlığımı çatdırmaq istəyirəm. Çox şadam ki, belə şəraitimiz var. Bizə qalan isə bu şəraitdən yararlanmaq, gənc güləşçilərə bilik və bacarığımızı öyrətməkdi. Eyni məsuliyyət də bizim gənclərin üzərinə düşür. Onlar da yaradılan bu şəraiti dəyərləndirməlidilər. Bu gün Azərbaycanda güləşlə məşğul olmaq və püxtələşmək üçün yaxşı idman zalları, bacarıqlı mütəxəssislər var. Biz bir güləş ailəsi olaraq da bunun qarşılığını öz nəticələrimizlə verməyə çalışmalıyıq. Əminəm ki, belə də olacaq.

[b]İLKİN SULTANLI



Yazı Azərbaycan Respublikasının Medianın İnkişafı Agentliyinin maliyyə dəstəyi ilə, “Uşaq və gənclərin fiziki və mənəvi inkişafı” istiqaməti üzrə hazırlanıb.