“Uşaq və gənclərin fiziki və mənəvi inkişafı” istiqaməti üzrə layihə çərçivəsində yazılarımız davam edir.

Bu dəfəki müsahibimiz Azərbaycan güləşinin Yunan-Roma növü üzrə istedadlı yetirmələrindən olan Sənan Süleymanovdu. 2022-ci ildə Konyada keçirilən V İslam Həmrəyliyi Oyunlarında 77 kq çəki dərəcəsində gümüş medal qazanan həmsöhbətimiz dünya çempionatında da eyni əyarlı medal qazanıb. Onun medal kolleksiyasını Avropa çempionatının qızıl, gümüş və bürünc medalları da zənginləşdirir.

- Sənan bəy, müsahiblərimizə ilk sualımız onların idmana necə gəlməsi ilə bağlı olur. Bu da onları daha yaxından tanımaq istəyi ilə bağlıdı. Siz güləşə necə gəldiz? Nə üçün məhz güləşi seçdiz? İlk məşqçinizi və məşqləri necə xatırlayırsız?
- İlk dəfə güləşlə tanışlığım 2006-cı ildə olub. Ondan iki il əvvəl, yəni 2004-cü ildə Afinada keçirilən Olimpiya Oyunlarını diqqətlə izləyirdim. Orda bizim təmsilçimiz Fərid Mansurov qızıl medal qazandı. Bu da məndə güləşə böyük maraq yaratdı. Belə deyim, güləşi seçməyimə səbəbkar Fərid Mansurovdu. Ondan sonra valideynlərimin də məsləhəti ilə Binə qəsəbəsində Yunan-Roma güləşi ilə məşğul olmağa başladım. İlk məşqçim Azər Hüseynov idi və indi də onun rəhbərliyi altında məşq edirəm. Cəmi 9 yaşım var idi, indi də o günləri yaxşı xatırlayıram. Atamla zala gəldik və orda idmana yeni başlayan uşaqlarla güləşməyə başladım. Üç uşaqla güləşdim və qalib gəldim. Yunan-Roma güləşinin nə olduğunu bilmədiyim üçün bəzən uşaqların ayağından tutub onlara yıxırdım. Azər Hüseynovun rəhbərliyi altında böyük həvəslə məşqlərə başladım. Bu günə qədər də eyni həvəslə davam edirəm. Ağır və şərəfli yolda addımlayıram, peşəmi davam etdirirəm. İnşallah, zədələrin imkan verdiyi müddətdə də davam edəcəm.



- Artıq gənc yaşlarınızdan uğur qazanmağa başlamısız. Bu uğurun sirrini nədə görürsüz? Uğur qazanmağınızda daha çox məşqlərdəki zəhmət rol oynayır, yoxsa istedad?
- Gənc yaşlardan qazanılan uğurların başlıca səbəbi zəhmətdi. Zəhmətsiz insan çox nadir hallarda uğur qazana bilər. Düşünürəm ki, qazandığım bütün nəticələrin arxasında intensiv məşqlər, bu məşqlərdə çəkilən zəhmət, eləcə də məşqçilərimin əməyi rol oynayır. Yığma komandaların məşqçilərinin mənim uğurlarımda rolu böyükdü. Onlar olmasaydı, mən bu gün bu nəticələri qazana bilməzdim.

- Bundan sonrakı hədəfləriniz hansılardı? Sizcə, bir idmançı üçün karyeranın zirvəsi hansı uğur hesab olunur?
- Bundan sonrakı hədəflərim dünya çempionu adını və Olimpiya Oyunlarının qızıl medalını qazanmaqdı. Bütün idmançılar buna can atırı. Ona görə də bu uğurları qazanmaq heç də asan deyil. Amma mən çalışacam ki, qarşıya qoyduğum məqsədlərə çatım və bunun üzərində işləyirəm. Bu ilin sentyabr ayında dünya çempionatı keçiriləcək və eyni zamanda həmin dünya çempionatı Olimpiya Oyunlarına lisenziya xarakteri daşıyacaq. Düşünürəm ki, bu çətin sınaqlardan üzüağ çıxıb, həm dünya, həm də Olimpiya çempionu olmağı bacaracam. Bir idmançı üçün Olimpiya Oyunlarının qızıl medalı karyeranın zirvəsidi. Bundan qiymətlisi yoxdu, ola da bilməz. Təbii ki, bu məqam olimpiya idman növləri sayılan sahələrə aiddi.



- Bəzən valideynlərdə övladlarınını idman bölmələrinə göndərməklə bağlı tərəddüd olur. Onlar övladlarının təhsildən uzaq düşəcəyindən narahat olurlar. Siz bu barədə nə düşünürsüz? İdmanla məşğul olmaq oxumağa mane olurmu?
- Bəli, son dövrlər belə halların şahidi oluruq. Valideynlər övladlarını idman bölmələrinə göndərməyə tərəddüd edir və çalışırlar ki, onları təhsilə yönəltsinlər. Amma mən düşünürəm ki, bu, heç də belə deyil. Mənim fikrimcə dünyada elə bir qayda yoxdu ki, hamı oxumalıdı və ya oxuyanlar idmandan uzaq qalmalıdı. Heç də hər kəs oxuyub, özünə peşə qazana bilməz. Eyni zamanda da yaxşı idmançı kimi yetişib, millətimiz və xalqımız üçün layiqli vətəndaş olmaq, bayrağımızı beynəlxalq yarışlarda dalğalandırmaq mümkündü. Razıyam ki, həm təhsilə, həm də idmana eyni zamanda uyğunlaşmaq çətindi. Hər bir sahənin özünün çətinliyi var, hansınasa vaxt ayıranda, digərindən uzaq qalırsan. Peşəkar idmanla məşğul olmağa başlayanda təhsil diqqətdən kənarada qalır. Mənim tövsiyyəm belə olar ki, yeniyetmə və gənclərimiz növündən asılı olmayaraq, idmana da maraq göstərsinlər. Ən azından ona görə ki, sağlam həyat, sağlam gələcək üçün idman vacibdi. Kiçiklər də böyüklərə baxıb, örnək götürəcək. Biz də öz komandalarımızda böyüklərə baxır, onlardan stimul alırıq. İndiki gənclərimiz də həyat yollarına sağlam şəkildə davam etməlidilər. Çox sevinərəm ki, yeniyetmə və gənclərimiz biz idmançılara baxsınlar, örnək götürüb idmanla məşğul olsunlar.

- Son sualım Azərbaycanda güləşin hazırkı durumu ilə bağlıdı. Bir güləşçi kimi siz hansı problemlərlə qarşılaşmısız və onların həlli yollarını necə görürsüz?
- Azərbaycanda güləş həmişə öndə gedən idman növləri sırasındadı. Bu gözümüzün önündədi. Ən əsas da güləşçilərimizin son zamanlar qazandığı uğurlar xoş bir nümunədi. Hər sahədə xırda və ya böyük problemlər ola bilər. Amma mən deyərdim ki, hazırda güləşdə vəziyyət xeyli yaxşılaşıb. Yığma komandalarımızın hansısa formada problemi yoxdu. Azərbaycan Güləş Federasiyasının rəhbərliyi idmançılarla yaxından maraqlanır, onların problemlərini dərhal həll edirlər. Çalışırlar ki, həll yollarını göstərsinlər. Bunun da qarşılığı güləşçilərimizin qazandığı uğurlardı. Fürsətdən istifadə edib, mən də üzərimizdə zəhməti olan güləşçilərə və federasiya rəhbərliyinə minnətdarlığımı bildirirəm.

İLKİN SULTANLI



Yazı Azərbaycan Respublikası Medianın İnkişafı Agentliyinin maliyyə dəstəyi ilə, “Uşaq və gənclərin fiziki və mənəvi inkişafı” istiqaməti üzrə hazırlanıb.