“Uşaq və gənclərin fiziki və mənəvi inkişafı” istiqaməti üzrə layihə çərçivəsində yazılarımız davam edir.

Azərbaycan idmanını güləşsiz təsəvvür etmək mümkünsüzdü. Güləşçilərimiz daim nüfuzlu beynəlxalq yarışlarda Azərbaycanı uğurla təmsil edir, vətənə medallarla dönürlər. Bugünkü müsahibimiz də belə idmançıların yetişməsində böyük rolu olan mütəxəssislərdən biridi.

"Football-plus.az" xəbər verir ki, Arzu Rəhimov Gəncədə yeniyetmə və gənclərə güləşin sirlərini öyrədir, Azərbaycan idmanı üçün gələcəyin çempionlarını yetişdirir.

- Arzu bəy, istərdim ki, sizi oxucularımıza daha yaxından tanıdaq. Güləşdə ilk addımlarınızı necə atdız, ilk məşqçinizi necə xatırlayırsız? Sizə güləşi sevdirən nə oldu?
- Məndə güləşə sevgi ailə bağlarından irəli gəlib. Özüm güləşçi ailəsində böyümüşəm. Atam Nadir Rəhimov Azərbaycanda tanınmış güləş məşqçilərindən olub. Onu çoxları “Lələ” ləqəbi ilə tanıyıb. Belə bir idmançı ailəsində doğulduğum üçün güləşi sevmişəm. Qardaşım da güləşçi idi. Özüm 1989-cu ildən 2001-ci ilə qədər güləşlə məşğul olmuşam. Yetərincə böyük müddətdi. Nadir Rəhimov kimi bir güləş mütəxəssisinin evində böyüdüyüm üçün güləşi sevməyə bilməzdim. Elə ilk məşqçim də atam olub, bu idman növünün sirlərini ondan öyrənmişəm.

- Məşqçiliyə başlamağa necə qərar verdiz?
- 2001-ci ildə hərbi xidmətdən qayıtdım və məşqçiliyə başlamağa qərar verdim. İdmançıları hazırlamaq üçün onlara gündə iki dəfə məşq keçirdik, səhər və axşam məşqlərində həvəslə çalışırdıq. 2004-cü ildən 2006-cı ilə qədər artıq yetirmələrim ilk uğurlarını qazanmağa başladılar.

Yetirmələrimə təkcə güləş fəndlərini öyrətmirdim, onlara cəsur olmağı, daim məşqlərə can yandırmağı öyrədirdim. Onlara cəsarət aşılayırdım. Elə buna görə də həmin uşaqlar çox qısa müddət sonra uğur qazanmağa başladılar. Özümün də məşqçiliyə böyük həvəsim var idi, atamdan öyrəndiklərimi güləşdə ilk addımlarını atan uşaqlarla böyük həvəslə paylaşırdım.



- Elə yetirmələriniz barədə danışardız. Onların hansı uğurları var?
- Sərxan Cəfərov, Tural Zeynalov kimi güləşçilərin adını qürurla çəkə bilərəm. Fazil Həsənov da böyüklər arasında mükafatçılar sırasına düşüb, beynəlxalq yarışlarda gümüş və bürünc medallar qazanıb. Ramiz Həsənov hazırda da böyük səylə məşqlərini davam etdirir, yarışlara qatılır, güləşməyə davam edir.



Murad Süleymanov adlı çox istedadlı güləşçimiz var. Yeniyetmələr arasında keçirilən yarışlarda dəfələrlə fərqlənib. Murad öz çəki dərəcəsində Azərbaycanda tanınmış idmançılardandı, gənclər arasında Avropa çempionatında gümüş medal qazanıb, onu finalda zorla uduzdurdular. 2015-ci ildə bu uğuru qazanıb. Növbəti il isə Avropa çempionu adını qazandı. Finalda rusiyalı tanınmış güləşçini məğlub etmişdu. Murad dünya kubokunun da mükafatçısıdı.

Ondan başqa Sadiq Hüseynov 2022-ci ildə yeniyetmələr arasında Avropa çempionudu, hazırda da yığma komandanın üzvüdü. Digər idmançılarımız da yığmanın heyətində məşq edir. İsa Yusibov da 15 yaşa qədər idmançılardan ibarət yığmaya dəvət alıb.



Perspektivli uşaqlarımız çoxdu. Qardaşımoğlu Rəvan keçən il 15 yaşadək güləşçilər arasında Avropa çempionu oldu. Xorvatiyanın paytaxtı Zaqrebdə keçirilən qitə birinciliyində fəxri kürsünün ən yüksək pilləsinə qalxdı, bayrağımızı ucaldıb, himnimizi səsləndirdi. Rəvan hazırda da məşqlərini davam etdirir. Bununla yanaşı, Tofiq Əliyevin adını çəkə bilərəm.



- Ümumiyyətlə, Gəncədə güləşə maraq hansı səviyyədədi? Yeniyetmələrin və gənclərin idmana olan marağı sizi qane edirmi?
- Gəncədə güləş, demək olar ki, ən populyar idman növlərindən biridi. Gənclərin çoxunda idmana maraq var. Buna bizim tanınmış idmançılarımızın çox olması da təsir edir. Toğrul Əsgərov, bilirsiz ki, olimpiya çempionudu. Yeniyetmələr də belə idmançılara baxır, güləşlə maraqlanır, onlar kimi olmağa çalışırlar. Biz əsasən yeniyetmələrlə və azyaşlılarla məşq edirik. Onların da güləşə marağı yüksək səviyyədədi.



Belə bir deyim vardı: “Hər evdən bir güləşçi”. İndi Gəncədə hər qapıdan olmasa da, üç evdən birində güləşçi çıxır. Valideynlər də güləşə maraq göstərir, övladlarını bu seçimdə dəstəkləyirlər. Fikrimcə, bu məqam da gələcək baxımından çox vacibdi.



- Son sualım idman və təhsil ilə bağlıdı. Bu iki amil bir-birinə mane olurmu? Təhsil idmançıların həyatında nə dərəcədə önəmlidi?
- Təhsil nəinki idmana, hər bir şəxsiyyətin formalaşmasına kömək olur, insanın inkişafına təkan verir. Savadlı idmançıyla məşq etmək də asandı. Çünki savadı olan idmançı güləşəndə də savadla güləşir, texniki fəndləri düzgün yerinə yetirir, taktikanı düzgün qurur. Bəli, müəyyən məqamlarda idmanla təhsilin toqquşması baş verir. Ölkə birinciliyində fərqlənən idmançılar yığmaya dəvət alır, davamlı keçirilən təlim-məşq toplanışlarına yollanır. Sözsüz, həmin müddətdə o idmançının təhsil aldığı məktəbə gəlməsi, dərslərdə iştirak etməsi də mümkün olmur. Belədə onun barəsində federasiyadan məktub gəlir, biz də onu idmançının təhsil aldığı məktəbə təqdim edirik ki, onu dərsdən yayınmış saymasınlar. Ondan sonra buraxılan dərslərin əvəzini ödəmək, proqramı mənimsəmək o idmançının üzərinə düşür. Bununla belə, şəxsi qənaətimdi ki, idmançı təhsildən yayınmamalıdı.

İLKİN SULTANLI




Yazı Azərbaycan Respublikasının Medianın İnkişafı Agentliyinin maliyyə dəstəyi ilə, “Uşaq və gənclərin fiziki və mənəvi inkişafı” istiqaməti üzrə hazırlanıb.