Misli premyer-liqasında mövsümə start verilib.

“Football-plus.az” xəbər verir ki, açılış matçında “Araz-Naxçıvan” “Turan Tovuz”u qəbul edib - 0:3. Oyundan sonra qonaqların çalışdırıcısı Ayxan Abbasovun mətbuat konfransı keçirilib. Sizi mütəxəssisin fikirləri ilə tanış edirik:

- Stadionunuzda gedən təmir işlərinə görə dörd oyunu səfərdə keçirəcəksiz. Bu, planlarınıza təsir edəcək?
- "Səbail"lə evdə oynamalıyıq. İstəyərdik ki, evdə oynayaq. Tovuzlu azarkeşlər bizi gözləyir. Rəhbərlik böyük işə başlayır. Müvəqqəti çətinliyə hər kəs dözməlidir. Tovuzda işıqlandırma sistemi qoyulur. Bölgələrdə nadir hallarda olurdu. Qəbələdən sonra Tovuzda da olacaq, axşam rahat oynayacağıq. Azarkeşlər də işdən sonra rahat futbol izləyəcək. Səbrli olmalıyıq. Əsas odu ki, səfər matçlarından maksimum istifadə edək.

- Növbəti turda "Qarabağ"la qarşılaşacaqsız. Fikriniz necədi?
- Avrokuboklarda oynayan komandaların heyəti genişdi. İstəyirəm ki, bütün rəqiblərə qarşı mübarizə aparaq. "Qarabağ" da onlardan biridi. Hazırlaşacağıq.

- İlk dəqiqələrdə "Araz Naxçıvan" daha üstün idi. Sanki arxayın idiz...
- Arxayın deməzdim. Rəqibdə yaxşı futbolçular var. Son günlər onları analiz etmişdim, yaxşı, keyfiyyətli futbolçulara sahibdilər. Fərdi səhvlər oldu, küləyin də təsiri var idi. Topu çıxarırdıq, üstümüzə gəlirdi. Əsas odur ki, düzgün oynadıq. Təzyiqdə qol buraxmamaq vacib idi. Vaxtımızı gözlədik.

- İki-üç tur lazımdı ki, istədiyiniz "Turan Tovuz"u görəsiz?
- İlk turlar həmişə çətindi. Heyətimizə baxsaq, keçən ilkindən fərqlidi, yenilər var. Yenilərin uyğunlaşması bizim üçün vacibdi. Komandanın potensialına bələdəm. İnanıram ki, daha yaxşı olacağıq.

- Heyət geniş olanda məşqçilər çaşqınlıq içində qalır. Sizdə belə problem var?
- Sağlam rəqabətimiz var. Oyundan-oyuna dəyişikliklər olacaq. Heyətimiz genişdi, amma rəqiblərdə bizdən də genişdi. Biz bir transfer edəndə, rəqiblər 3-4 transfer edir. Hamı bütün oyunları fikirləşir. Heyətin geniş olması yaxşıdı.

- Bu mövsüm üçün qarşınıza hansı məqsəd qoyulub?
- Rəhbərliklə üç illik plan fikirləşmişik. Futbolçularla da iki illik müqavilə imzalamışıq. Heyətimiz qorunmalıdı. Kubokda və çempionatda mübarizə aparıb, yuxarılarda olmaq istəyirik. Gələcəkdə iddialılar sırasında olmaq istəyiriksə, klub olaraq inkişaf etməliyik. Uşaq futbolundan tutmuş, stadion, baza... Geniş fikirləşirik. İddialı olmaq istəyirik. Vaxt lazımdı.

- Martin Petkov deyəsən Runi Evanın yoxluğunu hiss etdirməyəcək...
- Hücumda böyük rəqabət var. Bu il üstünlüyü hücumçulara vermişik. Paçu təəsssüf ki, zədələndi. Bir oyunçu da qoşulacaq. Rotasiyalar, dəyişikliklər edəcəyik. Runi ötən mövsüm yaxşı oynadı. Təəssüf ki, getdi. Martin Petkov gəncdi, Bolqarıstanın U-21 yığmasında oynayıb, gələcəyi var. Hamısına çox inanırıq.