“Premyer-liqada qalıb, daha yaxşı olmağa çalışacağıq”
Azərbaycan kubokunda yarımfinal mərhələsinə yekun vurulur.
“Football-plus.az” xəbər verir ki, “Neftçi” - “Turan Tovuz”u qəbul edib - 2:0. Oyundan sonra qonaqların çalışdırıcısı Ayxan Abbasovun mətbuat konfransı keçirilib. Sizi mütəxəssisin fikirləri ilə tanış edirik:
“Bilirdik ki, evdəki qələbəmiz "Neftçi"ni daha da aqressivləşdirəcək. Hər zamankından fərqli olaraq ilk dəqiqələrdən təzyiqi hiss etdik. Futbolçularım onların qarşısını ala bilirdi. Sonlarda yorğunluq öz sözünü deyirdi. Cərimə zərbəsindən qol vurdular və psixoloji üstünlük əldə etdilər. İkinci qol qismət idi. Top oyunçunun önünə düşdü. Bu il final qismət olmadı. Futbolçularıma və azarkeşlərə təşəkkür edirəm. Azərbaycan futbolunda belə ab-havalar üçün darıxmışdıq. İnanıram ki, böyüyəcəyik və bundan da yaxşı olmağa çalışacağıq. Vaxt lazımdı. Futbolçular belə oyunlar oynamalıdı. Üzgün olsaq da, çempionat matçları bizi gözləyir. Kuboka köklənməşdik, çempionatdakı stabilliyimizi itirmişdik. Çətin də olsa, bu il premyer-liqada qalıb, daha yaxşı olmağa çalışacağıq”.
- Ultramüdafiə oynayan "Turan Tovuz" gördük, futbolçular topu hara gəldi vururdular. Komandanın 11 dəqiqə topsuz qaldığı epizodlar oldu. Bu cür oyunla "Neftçi"ni keçmək mümkün idi?
- Evdəki üstünlüyümüzü qorumaq istəyirdik. Epizodlarımız da oldu. Belajdi Pusi epizoddan yararlansaydı... "Neftçi" bizi məcbur etdi ki, müdafiə olunaq. Bu komanda ilə açıq futbol oynayacaq gücdə deyildik. Hara gəldi vurmaq məsələsi ilə razı deyiləm. Futbolda olan məsələlərdi. Qapını toxunulmaz saxlamaq üçün bunlar normaldı. Hücumçular arxaya düşürdü, irəlidə heç kim olmurdu. "Neftçi" ilə "Turan Tovuz"u müqayisə edirsiz, çətindi mənim üçün. 0:4 uduzduğumuz çempionat oyununda açıq futbol oynamışdıq. Onda da rəqibin üstünlüyünü gördük. Tovuzdakı ilk oyunda tam müdafiəyə oturmamışdıq. Kompakt olmağa çalışırdıq. Sürətli əks-hücuma çıxmağı düşünürdük. Alınıb-alınmaması futbolçulardan asılıdı. Hər oyun istədiyimiz kimi olmur. "Neftçi" ilə "Turan Tovuz"u müqayisə ediriksə, tələsirik. Bəzi oyunçularımız bu gün ilk dəfə yarımfinal oynadı.
- Bu, "Turan Tovuz"un maksimumudu?
- Bu il premyer-liqada yeni olan komandalara baxıram, aşağı-yuxarı hamımız eyni səviyyədəyik. Stabilliyə, oyuna da baxanda, belə görünür. Bu mövsüm məqsəd liqada möhkəmlənməkdi. Güclənmək istəyiriksə, zaman lazımdı. Bu mövsüm maksimumu etdik.
- "Turan Tovuz" gələn mövsüm daha iddialı olacaq?
- Daha iddialı demək çətindi. Çempionatda neçə illər oynayan komanda var ki, çətinlik çəkirlər. Amma çalışacağıq ki, daha güclü olaq.
- Qarşıda 5 tur qalıb. Oynayacağınız komandaların hamısı da ağır rəqiblərdi. Dördü potensialda sizdən güclüdür. 35-ci turda "Səbail"lə ölüm-dirim mübarizəsinə girəcəksiz...
- Biz də hesablayırıq.Hər şey ola bilər. Bu komandaya gələndə də inanmışam. Digər komandalar da mübarizə aparır, xallar itirir. Kubok bitdi. Konsentrasiyamız bura idi. Final yaşayaraq azarkeşləri sevindirmək istəyirdik. Bu gün "Neftçi" ilə yarımfinal oynamağın özü də inkişafdı. Məğlubiyyət üzücüdür, amma lazımdı. Ümumilikdə hər şeyə hazır olmalıyıq… Məğlubiyyət üzücüdü, amma lazımdı. Ümumilikdə hər şeyə hazır olmalıyıq.
Digər xəbərlər
