Ölkədaxili yarışlarda susqunluq bitmək üzrədi.

Bu gün növbəti futbol mövsümü start götürür. Komandalar heyətini yetərincə gücləndirib. Hətta bəzi mütəxəssislər növbəti mövsümün əvvəlkilərdən yaxşı mənada fərqlənəcəyini iddia edir. “Kəpəz” istisna olmaqla bütün klubların sponsorunun olması, komandaların yaxşı toplanış keçməsi, bir neçəsinin avrokuboklara vəsiqəyə iddialı olması bu fikri səsləndirməyimizə əsas verir.

Misli premyer-liqasında yeni “futbol ili”nin belə maraqla gözlənilməsi milli komandanın da nəticələrinə az da olsa, təsir edə bilər. Görünən odu ki, klublarımızın transfer etdiyi əcnəbilər keyfiyyətlidi. Bu da azərbaycanlı futbolçuların inkişafına təkan verə bilər.

2022/23 mövsümündəki rəqabət bir sıra gənc oyunçuların parlamasına səbəb oldu. Bunlar Fuad Bayramov, Kamran Quliyev, Fərid Nəbiyev, Rəhman Daşdəmirov, Nihad Quliyev və başqaları idi. Daha çox “Şamaxı”nın üzvləri özünü doğrultdu desək, yanılmarıq. Yeni mövsümdə isə vəziyyət fərqlidi. Bütün komandaların heyətində yaxşı legionerlər var. 21 yaşadək futbolçu limiti də yığışdırılıb. Görəsən, heyətdə yer alan gənclərdən kimlər özünü sübut edə, mövsümün ulduzuna çevrilə bilər? Bu yazıda 10 komandada mövsümün ulduzu olmaq potensialına malik futbolçulardan danışacağıq.

1. Nəriman Axundzadə (Qarabağ) – 19 yaşlı vingerin yay təlim-məşq toplanışındakı və Çempionlar Liqasının təsnifat mərhələsindəki oyunu göz qamaşdırır. Avstriyada “Ferentsvaroş”la görüşdə dubl edən 21 yaşadək futbolçulardan ibarət yığmamızın üzvü “Qarabağ”ın gənc ulduzu olmağa namizəddi. Ramil Şeydayevin gedişindən sonra yarımmüdafiənin sağında boşluq yaranıb. Düzdü, Qurban Qurbanov burda daha çox Leandro Andradeni sınayır. Hücumun mərkəzində də özünü yaxşı tərəfdən göstərə bilən Nəriman bu mövsüm “Qarabağ”ın əsas heyət üzvünə çevirilsə, təəccüblənməyin.

2. Rauf Rüstəmli (Sabah) – 2022/23 mövsümündə “Qəbələ-2”də çox yaxşı perfomans sərgiləyən 19 yaşlı yarımmüdafiəçi “bayquşlar”ın gənc ulduzu ola bilər. Düzdü, “tələbələr”in heyətində bu mövqedə çox futbolçu var. Amma Murad Musayevin gənclərlə işləməyi sevən mütəxəssis olduğunu nəzərə alsaq, Rauf Rüstəmli də özünə bu komandada yer edə bilər. Ən azı rusiyalı mütəxəssis onu bir qədər geri çəkərək dayaq yarımmüdafiəçi kimi Elvin Camalovun əvəzinə oynada bilər. Onu da qeyd edək ki, 21 yaşadək futbolçulardan ibarət yığmamızın üzvü “Sabah”a böyük ümidlərlə transfer olunub.

3. Fərid Yusifli (Neftçi) – ötən ildən bakılıların əsas heyət üzvlərindən olan Fərid Yusifliyə bu mövsüm də ümidlər böyükdü. Yarımmüdafiəçi Laurentsiu Regekampfın ən sevimli futbolçularından sayılırdı. Düzdü, Adrian Mutunun gəlişindən sonra əsas heyətdə az şans qazanır. Hətta bir çoxları qeyd edir ki, 21 yaşlı futbolçu icarəyə veriləcək. Lakin Fəridin “Neftçi”də qalmaq ehtimalı böyükdü. “PARI Premyer” kubokundakı performansı Rusiya klublarının da diqqətini cəlb edib. Mutu futbolçunu bir qədər də komandada saxlayaraq qış “transfer pəncərə”sində baha qiymətə satmaq niyyətindədi. Bir sözlə, Fərid də bu mövsüm partlayış etmək potensialına malik gənclərdəndi.

4. Emil Səfərov (Qəbələ) – ötən mövsümün gənc ulduzlarından biri də “qırmızı-qaralar”ın 20 yaşlı yarımmüdafiəçisi idi. Pleymeykerin performansı hətta Canni de Byazinin diqqətini də çəkdi, onu milli komandaya dəvət etdi. Bu mövsüm də “Qəbələ”də Emilə ümidlər böyükdü. Yarımmüdafiəçi artıq “radarlar”ın əsas heyət üzvlərindən sayılır. Bu mövsüm ötənilki uğurlarının təsadüf olmadığını və yığmaya çağrılmağa layiq olduğunu isbat etməlidi.

5. Cavad Qurbanlı (Zirə) – 21 yaşlı müdafiəçi hələ ki “qartallar”ın əsas heyətində meydana çıxmayıb. Daha çox ikinci komandada top qovan futbolçunu Rəşad Sadıqov Türkiyənin Bolu şəhərindəki təlim-məşq toplanışa aparmışdı. Cavad Bolqarıstanın “Arda” klubuna keçən Cəlal Hüseynovun əvəzinə əsas komandaya cəlb olunub. İndi əsas məsələ gənc müdafiəçinin baş məşqçinin güvənini qazanaraq “Zirə”nin ulduzuna çevirilməsidi.

6. Sadiq Şəfiyev (Turan Tovuz) – 17 yaşlı hücumçu ötən mövsüm “boz qurd”un heyətində debüt etdi. Ayxan Abbasov ona iki görüşdə şans verdi. Sadiq cəmi 11 dəqiqə meydanda olsa da, azarkeşlərin diqqətini çəkə bildi. Bu il hədəfləri dəyişən “Turan Tovuz”da 17 yaşlı futbolçunun necə təsir bağışlayacağı maraq doğurur. Ola bilər ki, Ayxan bəy onu əvəzedici komandaya göndərsin. Lakin istənilən halda Sadiqin “Turan Tovuz”un heyətində partlayış etmək potensialının olduğunu söyləyə bilərik.

7. Nihad Əhmədzadə (Sumqayıt) – 17 yaşlı yarımmüdafiəçi 2022/23 mövsümündə “kimyaçılar”ın heyətində debüt etdi. Samir Abasov ona nə az, nə çox - tam 9 oyunda güvəndi. Nihad Azərbaycan çempionatları tarixində meydana çıxan ən gənc futbolçu ünvanına malikdi. Xüsusi texnikası ilə seçilən oyunçu bu mövsüm “Sumqayıt”ın əsas heyət üzvünə çevrilə bilər. “Kimyaçılar”ın ötən illə müqayisədə gücləndiyini nəzərə alsaq, sol cinah yarımmüdafiəçisinin işinin o qədər asan olmayacağını söyləyə bilərik.

8. Rüfət Əhmədov (Kəpəz) – 20 yaşlı futbolçu bu siyahıda premyer-liqa təcrübəsi daha çox olan futbolçulardandı. Yay “transfer pəncərəsi”ndə “Kəpəz”ə keçən sol cinah müdafiəçisi 2021/22 mövsümündə “Qəbələ”nin əsas heyət üzvlərindən biri idi. Sonradan zədələnən Rüfət yerini itirdi. “Kəpəz” onun karyerasında yenidən yüksəliş nöqtəsi ola bilər. Olduqca potensiallı futbolçudu. Azər Məmmədovun ona əsas heyətdə güvənəcəyini rahatlıqla söyləyə bilərik.

9. Sadiq Məmmədzadə (Səbail) – “dənizçilər”in əsas heyətinə nəzər yetirdikdə hansısa gənc futbolçunun şans qazanacağını söyləmək çətindi. Şahin Diniyev ümumilikdə yaxşı komanda formalaşdırıb. Sadəcə, 16 yaşlı Sadiq Məmmədzadənin bəzi matçlarda Səlahət Ağayevi əvəz edə biləcək potensialda olduğunu söyləmək olar. Qolkiper bunun üçün üzərində çox çalışmalı, Hüseynəli Quliyevdən daha yaxşı olduğunu məqşçilər korpusuna göstərməlidi.

10. Bayraməli Qurbanov (Araz-Naxçıvan) – 20 yaşlı futbolçu Azər Bağırovun xüsusi istəyi ilə Naxçıvan təmsilçisinə transfer olunub. Sol cinah vingeri potensiallı oyunçulardan sayılır. “Araz-Naxçıvan”ın yenidən formalaşması onun şansını daha da artırır. İstənilən halda legionerlər özlərini yaxşı tərəfdən göstərə bilməyəndə əsas seçim Bayraməli olacaq.

Bu futbolçular Misli premyer-liqasının 2023/24 mövsümündə partlayış etmək potensialı olan oyunçulardı. Ümid edək ki, bu siyahıda yer alan “10-luq”dan ən azı üçü-dördü əsas heyət üzvünə çevriləcək. Biz “10-luq” hazırladıq, iş onlara qaldı...

İLKİN SULTANLI