Misli premyer-liqasının 2022/23 mövsümü başa çatdı.

"Football-plus.az" xəbər verir ki, “Qarabağ” çempion oldu. “Sabah” gümüş, “Neftçi” isə bürünc medallara sahib çıxdı. Etiraf edək ki, 10 komandalı, 4 dövrədən ibarət çempionatda maraqlı hadisələrin şahidi olduq. “Futbol+”i müntəzəm izləyənlər başverənlərdən xəbərdardı. İndi Azərbaycan futbolunda fasilədi. Komandalar yeni mövsümə və avrokubokara hazırlaşır. Düzdü, qarşıdakı “futbol ili” ilə bağlı bəzi məsələlərə aydınlıq gəlməlidi. Bu səbəbdən də ictimaiyyət AFFA İcraiyyə Komitəsinin iclasını gözləyir. Qısaca, hələ ki ölkə futbolunda qismən sakitlikdi. Bundan istifadə edərək 2022/23 mövsümünü statistik məqamları əsasında silsilə yazıları diqqətinizə çatdıracağıq.

“Kəpəz” liderdi

2022/23 mövsümündə komandalar baxımından yeniliklər oldu. “Turan Tovuz”la “Kəpəz” premyer-liqada iştirak etməyə başladı. “Şamaxı” bütün mövsümü yeni adı ilə və stadionunda keçirdi. “Zirə” avrokuboklara vəsiqə qazanmaq üçün güclü heyət formalaşdırmağa çalışdı. “Səbail”in maliyyə imkanları artsa da, komanda ilk turlardan yaxşı oyun sərgiləyə bilmədi. “Sumqayıt” klub tarixində ilk dəfə legionerlərdən istifadə etdi. Bu da komandaların heyətində mümkün dəyişikliklərə səbəb oldu. Yalnız avrokuboklara vəsiqə qazanan kollektivlər böyük dəyişikliklər etmədi. Bu məqamları nəzərə alsaq, premyer-liqanın 2022/23 mövsümündə ən çox futbolçunun xidmətindən istifadə edən komandaların siyahısı aşağıdakı kimidi:

1. Kəpəz – 34
2. Turan Tovuz – 33
3-4. Sumqayıt – 32
3-4. Neftçi – 32
5. Zirə - 31
6. Şamaxı – 30
7. Səbail – 29
8. Qarabağ – 28
9. Sabah – 25
10. Qəbələ - 23

“Şamaxı” hamıdan cavandı

Təbii ki, çox oyunçudan istifadə etmək komandaya nəticə qazandırmır. Lakin kollektivin yaş ortalamasına təsir edir. Həmçinin sabitliyi tənzimləyir. Bəzi mütəxəssislər deyir ki, komandada yaş ortalamasının sabitliyi uğurlu nəticələrin qazanılmasına səbəb olur. Lakin Misli premyer-liqasının 2022/23 mövsümündə bu deyim alt-üst oldu. Çünki yaş ortalamasına görə çempionatın ən gənc kollektivi “Şamaxı”dı. Amma “şirlər” turnir cədvəlinin zirzəmisində qərarlaşdı. Nə qədər qəribə olsa da, ən yaşlı heyət “Qəbələ”yə məxsusdu. Amma bölgə təmsilçisi “qocalar”la həm premyer-liqada 4-cü, həm də kubokda qalib oldu.

1. Şamaxı – 23,9
2. Kəpəz – 24,7
3. Sumqayıt – 25,2
4. Turan Tovuz – 25,7
5. Sabah – 26,1
6. Səbail – 26,3
7. Qarabağ – 26,5
8. Zirə - 26,6
9. Neftçi – 26,9
10. Qəbələ - 27,2

“Qəbələ” akademiyasının fərqi

Son günlər ölkə futbolunda akademiya məsələsi gündəm olub. Mütəxəssislər, jurnalistlər telekanallarda, mediada bu problemi müzakirə edir. Görəsən, çempionatımızda bu məsələ ilə bağlı vəziyyət necədi? Klublar öz yetirmələrindən premyer-liqa matçlarında istifadə edib? Bu göstəricidə lider “Qəbələ”di. “Qırmızı-qaralar” akademiyasında yetişən 10 futbolçunun xidmətindən yararlanıb. Son pillələrdə isə “Kəpəz”lə “Səbail” qərarlaşıb. Adı çəkilən klublar öz yetirmələrindən birini belə nə meydana buraxıb, nə də adını protokola yazdırıb.

1. Qəbələ - 10 (Ülvi İsgəndərov, Rövlan Muradov, Murad Musayev, Emil Səfərov, Rüfət Əmirov, Hüseyn Mürsəlov, Rauf Rüstəmli, Mehrac Baxşəli, Elməddin Sultanov, Gülağa Əsədov)
2. Neftçi – 8 (Ömər Buludov, İsmayıl Zülfüqarlı, Fərid Yusifli, Vüsal Əsgərov, Ağadadaş Salyanski, Rüfət Abbasov, Əlirza Müştabazadə, Rza Cəfərov)
3. Şamaxı – 7 (Rəşad Əzizli, Rəhman Daşdəmirov, Fuad Bayramov, Emin Zamanov, Qurban Səfərov, Əkpər Vəliyev, Sahib Həsənov)
4. Sumqayıt – 6 (Səbuhi Abdullazadə, Süleyman Əhmədov, Rüfət Abdullazadə, Nihad Əhmədzadə, İlnur Valiev, Xəyal Fərzullayev)
5. Qarabağ – 5 (Qara Qarayev, Maksim Medvedev, Elvin Cəfərquliyev, Musa Qurbanlı, Toral Bayramov)
6. Turan Tovuz – 2 (Cavid Tağıyev, Mehman Hacıyev)
7. Sabah – 1 (Yusif İmanov)
8. Zirə - 1 (Nail Alışov)
9-10. Kəpəz – 0
9-10.Səbail – 0

Qeyd edək ki, bu statistik rəqəmlər “İnStat”dan götürülüb. Bu şirkət U-19 komandalarında çıxış edən futbolçuları akademiyanın üzvləri kimi qəbul edir.

İLKİN SULTANLI