Klublarımız üçün avrokubok yayı uzandıqca daha maraqlı olur.

Özü də təkcə “Qarabağ” yox, başqaları üçün də. Ağdamlı çempionun qitənin ən nüfuzlu klub turnirində irəliləmək perspektivi dünən yoxa çıxdı. Hər kəs elə düşünürdü ki, 2:3 dəhşətli, Qurban Qurbanovun və yetirmələrinin altından çıxa bilməyəcəyi hesab deyil. Amma “Rakuv”la səfər oyununun bəzi bölümlərində yol verilən boşluqlar, eləcə də Şahruddin Məhəmmədəliyevin izaholunmaz hoqqaları ağdamlıları yarıyolda qoydu. Qitənin ən nüfuzlu klub turnirinin qrupuna düşmək şansı əldən verildi. İndi “Qarabağ” ilk növbədə Avropa, alınmasa, Konfrans Liqasının qrupuna düşməyə çalışmalıdı. Belə hədəflərin çempionun və azarkeşlərinin iddiaları ilə nə dərəcədə uyğun olduğunu, inşallah, növbəti yazılarda müzakirəyə çıxararıq.

Bu gün isə birdən-birə üç təmsilçimiz meydana çıxacaq. “Qəbələ”yə də hər şeyin ən yaxşısını arzulayıb, diqqətinizi başqa məqama yönəltmək istəyirəm. Avqustun 3-də Bakıda və paytaxtın cəmi 20 kilometrliyində 1 saat fərqi ilə iki önəmli oyun keçiriləcək. Növbəti mərhələyə adlamaq şansı daha yüksək olan “Sabah” RFŞ-ni, istisnasız qələbə qazanmalı olan “Neftçi” isə “Jelezniçar”ı qəbul edəcək. Hər oyunun öz təbiəti, öz tarixçəsi olur. Əlbəttə, klublarımızı qələbəyə səsləyən ən müxtəlif əsaslar var. Məsələn, Sarayevodakı o ağzınacan dolu tribunaları, həmçinin o çılğın, ehtiraslı azarkeşin önündə özünü bəy balası, ev yiyəsi kimi aparan “Neftçi” oyunçusunu görən ağ-qara azarkeşin qanı heç qaynamadımı? Məgər o gündən sonra çevirmə təqvimi divardan asıb hər ötən günün ardından “möhtəşəm oyun, qisas anı yaxınlaşır” deyən azərbaycanlı azarkeş qeybə çəkilib? Məgər “Neftçi” Rəhman Hacıyevin o möhtəşəm qolunun davamını Bakıda gətirib iki həftə ərzində iki dəfə şəhərimizin qonağı olan inadkar, sırtıq “Jelezniçar”ın ağzının üstündən bir tərs şapalaq çəkməməlidi? Mən bu sətirləri yazıram, həyəcandan tüklərim biz-biz olur, indi gör “Neftçi”nin gerçək, dünyaya ağ-qara rənglərin daşıyıcısı kimi gələn, o rəngdə də gedəcək azarkeşi nə çəkir...

“Sabah”ın da özünə görə həqiqətləri var. Məsələn, Azərbaycan klubları nadir hallarda debüt mövsümündə avrokubokda tur adlayıb. Amma masazırlılar bu mənada gözəl imkan yaxalayıb. Səfərdə qazanılan 2:0-ı əldən vermək üçün ya meydana sərxoş çıxmaq lazımdı, ya da artıq 5-ci dəqiqədə iki futbolçunun meydandan qovulması. Əminəm ki, həmin gün tribunaları dolduracaq onminlərlə azarkeş və təcrübəli Murad Musayev latviyalıların sinov getdiyi sensasiyaya imkan verməyəcək.

Gəlib çıxdıq bu onminlərlə azarkeşin söhbətinə... “Neftçi” də, “Sabah” da Bakını təmsil edir. Sadəcə, bu klublar arasında ən müxtəlif parametrlər üzrə yerdən göyə qədər fərq var. Obrazlı yanaşsaq, biz tarix, yoxsa müasirlik, dünən, yoxsa bu gün müstəvisində müqayisələr aparmalıyıq. Bəs azarkeş bu müqayisənin harasındadı? Heç şübhəsiz, önündə, ortasında, mərkəzində, hər yerində!
“Məqsəd vasitəyə haqq qazandırır” kimi maksimalist yanaşma var. Biz “Neftçi”nin, yoxsa “Sabah”ın dolu tribunalar önündə oynayacağı ilə bağlı mülahizə yürüdərkən istinad nöqtəsi kimi onu götürməliyik ki, qələbə bu komandalardan hansına daha çox lazımdı? Nə gizlədim, rola girim, aktyorluq edim ki... Mənim gözümdə “Sabah” artıq RFŞ-ni keçib, heç düşünmədən indidən “Partizan”ın oyununu təhlil etməli, güclü və zəif cəhətlərini müəyyənləşdirməlidi. Yol göstərmək kimi çıxmasın, Murad Musayev bu işdə Patrik Andradenin də köməyindən yararlana bilər. Qələbə “Sabah”dan daha çox “Neftçi”yə, özü də hava-su kimi lazımdı. Oyunu penalti seriyasına daşımaq istənilən halda bəxtin ümidinə qalmaqdı. Ona görə də ağ-qaralar bu işi 90 dəqiqə ərzində bitirməli, “Dinamo-Minsk”in acı təcrübəsindən dərs çıxarmalıdı. Səfər oyununda 2:0-ı son 5 dəqiqədə əldən verən, Bakıya arın-arxayın gələn Belarus klubu burda çox sərt şəkildə cəzalandı, faktiki üstün olduğu oyunda vəsiqəni “Jelezniçar”a bağışladı. “Neftçi” bu səhvə yol verə bilməz və verməməlidi! Azərbaycanlı azarkeş iki ağ-qara rəngin duelini gözləyir və “Beşiktaş” növbəti dəfə Bakıya gəlməlidi. Orda isə artıq baxarıq, nə olar, nə olmaz...

Cümə axşamı “Neftçi” və “Sabah” azarkeşi üçün sınaq anı olacaq. Hər tərəf ağırlığını ortaya qoymalıdı. “Sabah” azarkeşi “Qarabağ”la çempionat oyununda tribunaları doldurmaqla sayını və əzəmətini göstərib. “Neftçi” isə dəfələrlə belə sınaqdan çıxıb. Əlbəttə, “Jelezniçar” və RFŞ səddi keçiləcək. Şəhərin ayrı-ayrı yerlərində, ayrılıqda və eyni zamanda birlikdə! Sadəcə, ona görə ki, Azərbaycan futbolunun belə qələbələrlə ehtiyacı var. İrəli, irəli və yalnız irəli!

HUŞƏNG