Hansı münasibdi: ÇL-in, yoxsa AL-in qrupu?
İki oyunun nəticəsinə görə “Viktoriya”ya yenilən “Qarabağ” Çempionlar Liqasının qrup mərhələsinə vəsiqə qazana bilmədi.
Əvəzində Qurban Qurbanovun çalışdırdığı komanda Avropa Liqasının qrupunda çıxış edəcək.
Plzendəki məğlubiyyətdən sonra futbol ictimaiyyəti arasında fikir ayrılığı yaşanır. Bəzilərinin fikrincə, ağdamlıların Avropa Liqasında çıxışını davam etdirməsi turnir perspektivi baxımdan daha məqsədəuyğundu. Belə düşünənlər nəhənglərin yer aldığı turnirin qrupunda sonuncu olub qışda mübarizəni dayandırmaqdansa, Avropa Liqasında daha münasib rəqiblərlə mübarizədə, heç olmasa, qrup üçüncüsü olub daha uzağa getməyin mümkünlüyünü söyləyirlər. Ancaq müəyyən qism də var ki, ÇL-in daha mötəbər turnir olduğunu bildirib, istər maliyyə, istərsə də nüfuz baxımdan burda qrup sonuncusu olmağı Konfrans Liqasınının 1/4 final mərhələsində çıxış etməkdən üstün tutur.
Həmkarımız, rekord.az portalının baş redaktoru Kənan Məstəliyev “Qarabağ”ın Avropa Liqasında çıxış etməsinin tərəfdarıdı. Onun “feysbuk” hesabında paylaşdığı statusu müəyyən ixtisarla təqdim edirik: “Hə, birini deyəndə, o birini də unutmayaq. Məğlubiyyətin obyektiv səbəblərini də unutmayaq. “Qarabağ” mövsümə çox tez başladı, millidən gələn oyunçular, demək olar ki, istirahət etmədi, bu onlara oyun formalarının zirvəsinə qalxmağa imkan vermədi, problemlər yaşandı. Maksimlə Qaranın zədələnərək sıradan çıxmasının səbəbi məhz budu. 8 oyunluq ÇL marafonuna ancaq bu qədər dözmək olardı. “Qarabağ”, bir Azərbaycan komandası, birinin stadionu, birinin avtobusu, birinin baş məşqçisi, birinin məramı, digərinin məqsədi olmayan komandaların toplaşdığı bir premyer-liqa təmsilçisi bura qədər gəlibsə, onu ancaq alqışlamaq olar. Özü də ayaqüstə, özü də azı 1 saat. Mən hələ də anlamıram ki, biz Polşa, İsveçrə və Macarıstan çempionlarını necə keçmişik? Möcüzədi, rəsmən möcüzə. Hələ təxminən 3 ay əvvəl “Bol idman” verilişində avrokubok perspektivini dəyərləndirərkən “Qarabağ”ın bu il Avropa Liqasının qrupunda oynacağını demişdim. Bəli, ÇL-i istəyirdik, ancaq reallıq başqadı. Bundan sonrakı yolu da göstərmişəm: AL-in qrupunda üçüncülük, Konfrans Liqasında 1/4 finala qədər yol… Ola bilər, cənablar, hər şey ola bilər”.
Ancaq sport24.az saytının baş redaktoru Ceyhun Əliyev Kənan bəyin fikirləri ilə razıalşmadı və qəzetimizə açıqlamasında bunları söylədi: “Mən bu məsələdə neytrallığın tərəfindəyəm. Nə mənada? Təbii ki, hamımız Qurban Qurbanovun çalışdırdığı komandanın “Viktoriya”nı udmasını istəyirdik. Fərqi yoxdu, sonra nə olacaq. Bəli, Avropa Liqasında nəyəsə nail olmaq daha real görünür. Bir halda ki, Avroliqanı daha real qəbul edirdik, nəyə görə ağdamlıları böyük coşqu ilə irəli səsləyirdik? Fikrimcə, Çempionlar Liqasının qrupuna düşmək daha yaxşı idi. Növbəti illər üçün təcrübə toplamaq baxımından qitənin bir nömrəli klub turnirinin qrupunda iştirak daha məqəsədəuyğun olardı. 9 ildi komanda avrokubokların qrupunda oynayır. Çempionlar Liqası kimi turnirdə sabitlik yaxalamaq üçün qrupa düşməyimiz daha yaxşı idi. Mən də o fikirlə razıyam ki, titanların çıxış etdiyi yarışda “Qarabağ”ın nəyəsə nail olacağı inandırıcı görünmür. Ancaq inkişaf və böyümək baxımından komandanın bir nömrəli turnirin qrupunda olması vacib idi. Bu turnir daha nüfuzlu, daha ağırdı. Maddi baxımdan da klub büdcəsini yetərincə artıra bilərdi”.
RƏŞAD
Digər xəbərlər
