Bu gün "Rakuv"un baş məşqçisi David Şvarqa da mətbuat konfransı keçirdi.

"Football-plus.az" xəbər verir ki, qonaqların çalışdırıcısı sözə belə başladı:

- Sabah ilk oyundakı üstünlüyü qoruyub-saxlamağa çalışacaqsız, yoxsa qələbə istəyirsiz?
- Əlbəttə, Bakıya gəlməyimizin məqsədi qalib gəlməkdi. Təbii, nəzərimizdədi ki, bir top fərqi ilə qalib gəlmişik. Amma sabahkı matçda da qələbə qazanmağa çalışacağıq.

- Penalti seriyasına hazırlaşmısız?
- Çempionlar Liqasındakı bütün mərhələlərdə penaltilərə də hazırlaşırıq. Sabahkı oyunun axarı bunu göstərəcək. Ümumiyyətlə, belə matçlara kompleks şəkildə yanaşırıq. Təbii ki, penalti seriyasına da hazırlaşırıq. Qapıçımızdan və onun qapını necə qorumasından çox şey asılıdı.

- İlk oyundan sonra demisiz ki, "üzümü turşudub "Qarabağ"a tərəf baxırdım ki, onları qorxudum". Qorxuda bilmisiz?
- Bu mənim həmişə göstərdiyim sifətdi. O epizodda heç kimi qorxutmağa çalışmamışdım.

- İlk oyunda "Qarabağ"ın qapıçısının buraxılan üç qolda da səhvi var idi. Bu səhvlər sizə psixoloji üstünlük qazandırır?
- Bu, bizlə bağlı deyil. İstənilən halda, oyuna hazırlaşırıq. Əlbəttə, hər bir matça hazırlaşanda rəqibin zəif nöqtələrini özümüz üçün qeyd edirik. Amma yenə də diqqətimizi buna yox, öz oyunumuza yönəldirik.

- Ötən mövsüm "Qarabağ" "Lex"ə səfərdə uduzsa da, Bakıda rəqibini böyük hesabla məğlub etmişdi. Bu hal sizi nə qədər narahat edir?
- "Qarabağ"ın digər oyunlarını da təhlil etmişik. "Lex"in ötənilki vəziyyətinə də diqqət yetirmək lazımdı. "Lex"lə "Rakuv" tam fərqli gücə, oyun üslubuna malikdi. Sabah bu məsələ bizim oyunumuza təsir göstərməyəcək.

- Siz dərin təhlillərdən sonra daha çox nəyə diqqət yetirirsiz? Komanda üzvlərinin fiziki durumu nə yerdədi?
- "Qarabağ"la matçdan əvvəl bu təhlilləri açıqlamaq düzgün olmazdı. Oyun sabah olacaq. Təhlillərimi burda açıqlamaq istəməzdim. Biz hər gün hazırlaşırıq. Düşünmürəm ki, fiziki cəhətdən oynamayacaq durumda olaq. Heç bir problem olmamalıdı.

CAVİD ƏLİYEV