Sabah "Qarabağ" Çempionlar Liqasının cavab görüşündə doğma meydanda Polşa təmsilçisi "Rakuv"la qarşılaşacaq.

"Football-plus.az" xəbər verir ki, matçdan öncə ağdamlıların çalışdırıcısı Qurban Qurbanovun mətbuat konfransı keçirilib. Sizi mütəxəssisin fikirləri ilə tanış edirik:

- Şahruddin Məmmədəliyev "Rakuv"la ilk matçda səhv etdi. Sabahkı oyunda yenə ona güvənəcəksiz?
- Şahruddin haqda yazılanlardan xəbərim var. Onun da oynamaq şansı çoxdu. Bütün diqqətimizi rəqibə yönəltmişik. Hər bir futbolçu yaxşı mübarizə aparmalıdı.

- Polşadakı oyundan sonra ki, rəqibi yaxşı tanıdığınızı dediz. Bu barədə nə deyə bilərsiz?
- Mən hər oyundan sonra rəqiblər haqda belə sözlər deyirəm. Polşadakı matçda da gördük ki, "Rakuv" ciddi komandadı. Bakıda fərqli oyun göstərməliyik. "Rakuv"la yaxından maraqlanmışam. Az müddətdə böyük iş görüblər. Bu komandaya simpatiyam yarandı. Amma sababkı oyunda daha ciddi olmalıyıq.

- "Rakuv"un sabiq baş məşqçisi Papşun deyib ki, bu komandanın mərhələ adlamaq şansı yüksəkdi. Komandanın memarı odu, ancaq o gedəndən sonra “Rakuv” onun vaxtındakı kimi səliqəli müdafiə olunmur. Sizcə də belədi? Hər halda, onlara iki qol vura bilmisiz...
- "Rakuv" elə formalaşıb ki, hansısa məşçqi getsə də, iş prinsipləri, sistemləri qalacaq. Sadəcə, onu icra edənlər hansı səviyyədə edəcək – bu başqa məsələdi. Onlara qarşı qışda da yoldaşlıq görüşü oynamışdıq. Demişdim ki, dəyişiklik var. İndi komandada inam var, bir-birini daha yaxşı anlayırlar. Təcrübələri də artıb. Baş məşqçisi futbolun içində böyüyüb, yaşı çox deyil. Amma işində məsuliyyətlidi. Deməzdim ki, müdafiə xətti zəifləyib. Futbolda görürsən ki, bir anlıq hansısa sistem pozulur. Futbolçularım da istifadə etdilər və iki qol vurduq. "Rakuv" təkcə müdafiədə yox, meydanın hər yerində yaxşı müdafiə oluna bilir. Desəm ki, zəif tərəfləri var, düzgün çıxmaz. Amma bu rəqibə qol vurmaq üçün daha fəal olmalıyıq. Çünki "Rakuv" çox yaxşı müdafiə bacarığı və hücum potensialı olan komandadı.

- Sabah Juninyonun meydana çıxmaq şansı var?
- Vəziyyəti yaxşıdı. Bu həftə komanda ilə məşqlərdə iştirak edib.

- Sabah komandanız qalib gəlmək üçüm daha çox nəyə fikir verməlidi?
- Bəzi elementləri bildirdim. Futbolda belə bir şey var ki, qalib gəlmək istəyirsənsə, öz oyununu oynamaq istəyirsənsə, rəqibə imkan verməmək lazımdı. İlk növbədə "Rakuv"a imkan verməməliyik ki, oyunlarını qursunlar. Digər tərəfdən futbolçuların fərdi ustalığı ola bilər ki, yaxşı nəticə etmək üçün vacib olsun. İstənilən halda, oyunumuzdan, prinsiplərimizdən əl çəkməyəcəyik. Çünki bu günə qədər əldə olunan nəticələr bu prinsiplərə görə olub. Futbolçularımın bütün konsentrasiyası oyuna olmalıdı.

CAVİD ƏLİYEV