“Fənərbaxça”nın bu mövsüm bir sıra transferləri böyük suallar doğurur.

Bruma ilə bağlı fiasko unudulmamış indi də Qustavo Enrike ilə bağlı böyük bir qeyri-müəyyənlik yaşanır. Bilindiyi kimi, İstanbul nəhəngi ötən yay Kim Min Çjeni 18 milyon avroya “Napoli”yə satandan sonra onun yerinə Qustavo Enrikeni heyətə qatmışdı. 196 sm boya malik 29 yaşlı müdafiəçi çox ağır olduğu üçün fanatlar ilk gündən onun transferini istəmirdilər. Azarkeşlər onun yerinə “Fluminense”nin 25 yaşlı müdafiəçisi Ninonun alınmasını tələb edirdilər. Amma rəhbərlik Jorje Jezuşun da xeyir-duası ilə “Flamenqo”dan Enrikeni birilliyə icarəyə götürdü. Bunun qarşılığında “sarı-lacivərdlilər” qarşı tərəfə 1,4 milyon avro ödəmək öhdəliyini boyunlarına götürdülər. Bu azmış kimi, müqavilədə daha bir maddə mövcuddu. “Sambaçı”nın mövsümün gedişində uzunmüddətli və xroniki bir zədəsi olmasa, “Fənər” daha 1,4 (yəni ümumilikdə 2,8) milyon avro ödəyərək onu daimi əsasda transfer etməlidi. Amma hələ ilk dövrənin gedişində fanatların qorxduğu oldu. Belə ki, tez-tez səhvlərə yol verən və cəld hücumçulara qarşı oyunlarda çətinlik çəkən Qustavonun “Fənər”in səviyyəsinə uyğun gəlmədiyi üzə çıxdı. Məhz bu üzdən komanda bu qış “Adana Dəmirspor”dan Samet Akaydını transfer etdi. Luan Peresin də artıq zədəsini sağaltdığını nəzərə alsaq, Qustavo Enrike faktiki olaraq artıq nə “Fənər”ə, nə də Jezuşa lazımdı. Rəhbərlik “Flamenqo” rəsmiləri ilə əlaqə quraraq futbolçunu geri göndərməyi təklif etdi. Amma braziliyalılar bu təklifi nəinki rədd etdilər, hətta Qustavoya görə onlara ödənilməli olan 1,4 milyon avronu tələb etdilər! Pul məsələsi belə görünür, iki klub arasında münasibətləri bir qədər də gərginləşdirəcək. Çünki müqavilədə qeyd olunub ki, Enrike minimum 25 rəsmi oyuna çıxacağı təqdirdə “Fənər” 1,4 milyon avro ödəməli olacaq. “Sambaçı” indiyə qədər 22 rəsmi oyuna çıxıb və böyük ehtimalla artıq onu meydanda görməyəcəyik! Bu da o deməkdi ki, “Fənər”də növbəti transfer fiaskosu yaşanır. Xatırladaq ki, mövsümün əvvəlində heyətə cəlb olunan Bruma komandaya çox başağrı oldu. Zədələnən, üstəlik zəif təsir bağışlayan portuqaliyalı vingerin adı ilk dövrədə heç bir turnirdə iştirak ərizəsinə salınmadı. Qışda isə “Fənər” məcburiyyətdən 4,25 milyon avro ödəyərək onu PSV-dən daimi əsasda transfer etdi və sonra da “qəpik-quruşa” “Braqa”ya icarəyə göndərdi. Yəni göz görə-görə klubun milyonları havaya sovrulur! Bütün bunlar azmış kimi, bu mövsümdəki digər yeni transferlər Linkoln Enrike ilə Ezcan Alioskinin də artıq Jezuşun planlarına daxil olmadığı barədə şayiələr gəzir. Rəhbərlik onlardan da qurtulmağın yollarını axtarır. Təbii ki, bu durum fanatların böyük narazılığına səbəb olub. Sosial şəbəkələrdə fanatlar bu mövsümdəki transfer siyasətinə görə Əli Koçu sərt tənqid atəşinə tutublar. “Fənər” bu mövsüm 15 yeni futbolçu üçün ümumilikdə təxminən 45 milyon avro ödəyib ki, bu da klubun yeni rekordu kimi tarixə düşüb.