Premyer-liqada növbəti mövsümə 20 gün sonra, yəni avqustun 4-də start veriləcək.

Bu haqda iyunun 8-də PFL-in rəsmi saytı məlumat yaymışdı. Ona görə ki, xüsusilə elita klublarına yaxşı nəticə əldə edə bilmək üçün təxminən 2 ay hazırlıq müddəti lazım olur. Ölkədə bu vaxtdan maksimum istifadə edənlər olduğu kimi, boşa verənlər də var. Bu mövzuda “Nefçi”dən sonra ağla gələn komanda “Araz Naxçıvan”dı. Xatırlayırsızsa, Muxtar Respublika təmsilçisi 1-ci divizionda sona 3 tur qalmış ən yaxın izləyicisi "Neftçi-2"ni 11 xal qabaqlayaraq çempionluğunu rəsmiləşdirmişdi. Əlamətdar hadisə mayın 4-də baş vermişdi. İdman prinsiplərinə əsasən, klubun növbəti mövsümdən premyer-liqada iştirak edəcəyi artıq bəlli idi. Təəssüf ki, o vaxt sabiq rəhbərlik hazırlıqlara start vermək əvəzinə AFFA İcraiyyə Komitəsinin qərarını gözləməyə başladı. Həmin dönəmdə klub rəsmiləri deyirdilər ki, ölkə çempionatında iştirakımız dəqiqləşən kimi hazırlığa başlayacağıq. Halbuki futbol qurumu çoxdan idman prinsipinin qorunacağını demişdi. Xülasə, qərar açıqlandı və naxçıvanlı azarkeşlər şad xəbərə sevindi.

Lakin klub gözləntiləri doğrultmadı. Nə komandanın formalaşdırılmasına başlandı, nə stadionla bağlı bərpa işləri görüldü, nə də sponsorlarla danışıqlar bəhrə verdi. Klubla bağlı uzun sürən sakitlik dönəminə 3 gün əvvəl yeni İdarə Heyətinin elan olunması ilə nöqtə qoyuldu. Belə ki, Ramin Axundov prezident, Vüqar Abbasov yeni yaradılan Müşahidə Şurasının sədri, Orxan Hüseynov isə onun müavini oldu. İcraçı director vəzifəsi isə Eldəniz Yusubova həvalə edildi. O, təyinatı ilə bağlı “Futbol+”ə açıqlamasında yeni rəhbərliyin gəlişi ilə klubun hədəflərinin dəyişdiyini bildirdi. Deməli, “Araz Naxçıvan” növbəti mövsüm avrokuboklar uğrunda mübarizə aparacaq. Belə olan halda futbol ictimaiyyətində çaşqınlıq yarandı. Çoxları düşündü k, böyük futboldan illərlə uzaq düşən, yetərli büdcəsi olmayan, indiyə qədər heç bir futbolçu ilə müqavilə bağlamayan, stadionu premyer-liqaya yararsız klubun yeni rəhbərliyi qızıl balıq tapıb. “Qeybdən xəbər alıblar” desək, doğru olmaz. Çünki “futbol ili”nin sonunda Naxçıvan təmsilçisini ilk “4-lük”də görmək möcüzəyə bərabərdi. Fələyin işinə bax ki, elə həmin gün “Araz Naxçıvan” yoxlama oyununda “Turan Tovuz”a 1:5 hesabıyla uduzdu. Darmadağınla bitən matçdan sonra jurnalistlərin önünə çıxan baş məşqçi Azər Məmmədov bir çox səbəb sadaladı. Mütəxəssis məşqlərə bir neçə gün öncə başladıqlarını və heyətin tam hazır olmadığını dedi. Bildirdi ki, komanda tapşırıqları cəmi 50-60 faiz yerinə yetirə bilib. Anlaşılır ki, çalışdırıcı durumdan narazıdı. Niyə də olmasın?! Adam təcrübəli premyer-liqa klublarının əvəzedici komandaları üzərində mütləq zəfər qazanaraq ölkə çempionatını alın təri ilə haqq edib. Çünki həmin dönəmdə klubun stadion, büdcə və heyətlə bağlı heç bir çatışmazlığı yox idi. Azər Bağırov yaradılan şəraitə təcrübəsini əlavə edərək tapşırığın öhdəsindən gəlməyi bacardı.

Təbii ki, hər şey qaydasındadısa, rəhbərliyin baş məqşçidən nəticə tələb etməsində qüsur yoxdu. Bəs indi? “Araz Naxçıvan”ı növbəti mövsümün sonunda Avropada görmək istəyən rəhbərlik istəyinə çatmasa, qüsuru kimdə axtaracaq? Komandanın ev oyunlarını “doğma divarlar” arasında keçirməsi üçün şərait yaratmayan, yerli və legioner futbolçularla rahat danışıq aparmayıb transfer prosesini həftələrlə gecikdirən əvvəlki rəhbərlikdə? Yoxsa Naxçıvan təmsilçisi də gələcəyin “Neftçi”si olacaq? Bunu zaman göstərəcək. O bəllidi ki, “Araz Naxçıvan” ilk “dördlük” arzusunda gecikib…

KƏNAN BAHADIR