Bu il “Araz Naxçıvan”ın yaranmasının 55 illiyidi.


Bu münasibətlə Muxtar Respublika təmsilçisi futbol adamlarını və media mənsublarını Naxçıvana dəvət edib. Görəsən, klub rəhbərliyinin planlarına nələr daxildi? “Araz Naxçıvan” hansısa klubla qarşılaşacaq? Muxtar Respublikanın paytaxtından turnir keçiriləcəkmi?

Bu suallara aydınlıq gətirmək üçün klubun idarə heyətinin üzvü Sakit Rzayevlə əlaqə saxladıq. Naxçıvan təmsilçisinin rəsmisi məsələyə belə münasibət bildirdi:

“Araz Naxçıvan”nın yaranmasının 55 ili tamam olur. Biz bu yubleyi uşaq futboluna həsr etmişik. Şüarımız “1 uşaq, 1 top”du. Naxçıvanda futbolun kütləviyini, uşaqların bu idman növünə marağını artırmaq üçün işlər görəcəyik. Azyaşlılara nə lazımdı? Təbii ki, forma və top. Bunlar uşaqlar üçün ən yaxşı stimuldu. Biz də bunun üzərində fikirləşdik. Qərar verdik ki, belə bir layihə həyata keçirək. İyunun 1-də, saat 15.00-da insanlar stadiona yığışacaq. Əyləncəli, maraqlı yarışlarımız olacaq. “Araz Naxçıvan”ın veteranları ilə gəncləri arasında futbol matçı da baş tutacaq. Görüş 30 dəqiqə çəkəcək. Bundan sonra, saat 18.00-da günün rəsmi proqramı start götürəcək. Burda bir çox qonaq iştirak edəcək. Dövlət rəsmiləri, vaxtilə “Araz Naxçıvan”ın heyətində çıxış etmiş Vaqif Sadıqov, Oqtay Abdullayev və Maşallah Əhmədov kimi veteranlar qonağımız olacaq. Toplar, formalar rəsmi mərasimdən öncə azyaşlılara veriləcək. Təbii ki, bu tədbiri keçirməyimizin səbəbi var. Növbəti mövsümdən Naxçıvanda uşaq liqalarını bərpa etmək istəyirik. 10-14 yaşlı futbolçuların çempionatını keçirəcəyik. Çalışacağıq ki, 15-16 yaşlı oyunçulardan ibarət komanda da yaradaq. Bildiyiniz kimi, “Araz Naxçıvan” növbəti mövsümdən 1-ci divizionda çıxış edəcək. Bu istiqamətdə də işlərimizi media nümayəndələrinə və qonaqlara təqdim edəcəyik”.

İLKİN SULTANLI