“Qalatasaray”ın yolunu səbirsizliklə gözlədiyi Mauro İkardinin cümə axşamı Türkiyəyə gələcəyi ilə bağlı iddialar təsdiqini tapmayıb.

Düzdü, demək olar, bütün mənbələr iddia edir ki, argentinalı forvardla artıq razılıq əldə olunub. Onun Türkiyəyə nə vaxt gələcəyi bilinməsə də, rəhbərlik İkardinin iyulun 25-26-da baş tutacaq ÇL-in 2-ci təsnifat mərhələsinin ilk oyununda heyətdə olacağına əmindi. Bu arada İkardinin meneceri və həyat yoldaşı Vanda Naranın səhhəti ilə bağlı problem yaşadığı məlum olub. Argentina mətbuatının yazdığına inansaq, Nara çərşənbə axşamı kəskin qarın ağrısından şikayət edib və tibbi yardım maşını ilə xəstəxanaya çatdırılıb. Bu hadisə üzündən cütlük tətil planlarını dəyişməli olub. Deyilənə görə, İkardi bu hadisəyə görə ciddi narahatlıq keçirib. Nara qarın ağrısının səbəbini müəyyənləşdirmək üçün bir sıra analizlərdən keçməli olub. Onun vəziyyətinin normal olduğu deyilsə də, xəstəxanadan çıxıb-çıxmaması barədə məlumat yoxdu.

"Football-plus.az"