Srağagün “Neftçi”nin “sükanı arxasına” keçən Adrian Mutunun azərbaycanlı azarkeşlərin maraq dairəsinə düşməsi təbiidi.

Rumıniya futbolunun əfsanələrindən biri haqqındakı bəzi maraqlı məqamlarla tanış olun.

Vaxtilə atası Spiridon "Timişoara"da, anası Rodika isə "Karmen" komandasında qapını qoruyub. Spiridon Mutu universitetdə riyaziyyatdan dərs deyb, Rodika vaxtilə kompüter proqramlaşdırılması ilə məşğul olub. Bu üzdən Mutu uşaqlıqdan rəqəmləri çox xoşlayır.

Adrianın ilk evliliyində nigah şahidi George Haci olub, ikinci dəfə isə Dominikan Respublikasının maliyyə nazirinin qızı Konsuela Matos ilə ailə həyatı qurub.

Mutunun ən çox sevdiyi rumın futbolçu Nikolae Dobrin olub, necə deyərlər, stajlı azarkeşlərin onun haqqında danışdığı hekayələrin təsiri altında böyüyüb. Sonradan kumirinin rəhbərliyi altında "Arceş"də oynayıb. Mutu Dobrin haqda "o, Ronaldinyonun indi meydanda göstərdiyi oyunu 30 il əvvəl göstərirdi" deyib.

"Arceş"in yeniyetmələrdən ibarət komandasında məşqçiyə hücumda oynamalı olduğunu sübut etmək üçün cinahda oynamasına baxmayaraq, bir mövsümə 40 qol vurmağı bacarmış və komandasını çempion etmişdi. 3 il sonra Rumıniya çempionatının bombardiri Konstantin Barbu Asiyaya yollanandığından əsas komandanın hücum xəttində yer almağa başlamışdı.

2000-ci ildə heyətində Ronaldo, Vyeri, Samorano və Roberto Baconun olduğu "İnter"ə yollanaraq Milan derbisində qol vurmağı bacarmışdı. Bir neçə il sonra "Yuventus"da otaq yoldaşı olacaq İbrahimoviç bu vaxt hələ "Malmö"də oynayırdı (aralarında iki yaş fərqi var).

Növbəti mövsüm "Verona"nın heyətində çempion "Latsio"ya qarşı oyunda Nesta, Mihayloviç, Neqro və Favallidən qurulmuş müdafiə xəttinin ən ağır oyunlarından birinin səbəbkarına çevrilmişdi. Həmin vaxt komandada ona gələcək dünya çempionları Oddo, Kamoranezi və Cilardino kömək edirdilər.

Mutu Çezare Prandellinin sevimlisi idi. Məşqçi deyirdi ki, top hər dəfə onun ayağına dəyəndə sanki əsrarəngiz musiqi eşidirik. Onun rəhbərliyi altında "Parma"da Adriano, "Fiorentina"da isə Cilardino ilə yaddaqalan günləri keçib.

"Çelsi"də Mourinyo ilə yola getməməsi, AÇ-2000-dəki debütü, AÇ-2008-də penaltidən Buffonu məyus edə bilməməsi, xarakterində və bundan qaynaqlanan həyatındakı problemlər bilinən faktlardı. Məşqçi Mutunu tənqid etmək, hətta ona zarafatla atmacalar atmaq anlaşılandı. Amma futbolçu Mutu ilə məzələnənlər, deyəsən, onun karyerasını əvvəldən axıra qədər izləmiş adamların hələ sağ olduğunu unudublar.

ELZAMİN HACIYEV