"Bu addım PFL-in İdarə Heyətinin qərarı ilə atıldı. Düşündük ki, qurumun adında liqa sözü varsa, təşkilatçılığına cavabdeh olduğu çempionatların adları da liqa adlandırılsa, daha uyğun olar. Hər iki liqanın yayını məsələsinə gəlincə, bəli, tamaşaçılar həmin oyunlardan görüntüləri izləyə biləcək. 1-ci liqanın bütün oyunlarının canlı, 2-ci liqanı isə icmal şəklində təqdim etməyi düşünürük. Amma bir məqam var. Bilirsiz ki, PFL olaraq, ötən mövsüm “İnsports” şirkəti ilə müqavilə bağladığımızdan son 4 ayda keçirilən oyunların yayınını onlara ötürürdük. Bu müqavilə artıq yekunlaşıb. Həm “İnsports”, həm də başqa bir xarici şirkət ilə danışıq aparırıq. Ola bilər ki, anlaşaq. Belədə premyer-liqa və 1-ci liqanın yayınını onlara ötürək. Amma çalışacağıq ki, bu dəfə izləmək istəyənlər daha az məbləğ ödəsin.

O ki qaldı 2-ci liqaya, matçların hamısında çəkiliş qrupumuz olacaq. Sadəcə, canlı və ya icmal şəklində təqdim edəcəyimiz hələ bəlli deyil. Köklü klubların kənarda qalmasının və onların yerinə bir ildi yaranan komandaların çempionata buraxılmasının səbəbini də izah edim. Bütün komandaların müraciətinə baxıldı. Sənədlər müzakirə üçün İcraiyyə Komitəsinə təqdim olundu. Müraciət edən komanda sayı çox idi. Belədə kimlərinsə kənarda qalacağı gözlənilən idi. Məsələyə İcraiyyə Komitəsi tərəfindən baxıldı. Düşünürük ki, komitə tərəfindən bütün detallar nəzərə alınaraq durumu minimal tələblərə cavab verənlərə iştirak imkanı yaradılıb.

Həm də bu mövsüm rəsmi şəkildə imkan var ki, adını çəkdiyiniz komandalar qalib gələrək 2-ci liqaya vəsiqə əldə etsinlər. Bu zaman kəsiyində onlar qalan çatışmazlıqları da aradan qaldıra bilər. Ümumilikdə isə adını çəkdiyiniz komandalar da daxil olmaqla bəzilərinin, ümumiyyətlə, stadionu yoxdu, ya da düzəldilməsi illər aparacaq.

Bununla yanaşı, bir çox məqamlar var. Məsələn, 1-ci liqada hər komandaya dövlət tərəfindən 300 min manat ayrılıb, amma komandaların özlərinin də sponsorlarının olması, infrastrukturu düzəltmək imkanları müzakirə edilib. Rayon rəhbərliyinin komandaya dəstəyi də bura daxildi. Məsələn, Saatlı stadionunda problemlər var idi. Amma Olimpiya Kompleksinin rəhbəri Aqil müəllim işlərə başlayıb. Stadionun hasara alınması, texniki zonanın düzəldilməsi, suvarma sisteminin qurulması həyata keçirilir. Yevlax şəhər stadionunda komanda üçün baza tikilir. Təbii örtük Qəbələdən dəvət olunan mütəxəssislər tərəfindən yenilənir. Ağsuda da, bilirsiz ki, infrastruktur var. “Difai”nin rəhbəri idmanın içindən çıxan adamdı, futbol təcrübəsi var. Özü də kluba maliyyə ayıracaq imkana malikdi. “İrəvan” da ciddi hədəflərlə gəlir. İnfrastruktur problemləri yoxdu, eyni zamanda, komandaya yaxşı maliyyə ayıracaq, güclü komanda quracaq durumdadılar".