Türkiyə yığmasının yoldaşlıq matçında rəqibi bəlli olub.

"Football-plus.az" xəbər verir ki, bilindiyi kimi növbəti yığma ''pəncərəsi'' sentyabra təsadüf edəcək. Türkiyənin AÇ-2024-ün seçmə mərhələsində yer aldığı 5 komandalı D qrupunda hər tur bir yığma istirahət edir. Türkiyə 5-ci tur çərçivəsində sentyabrın 8-də Ermənistanı qəbul edəcək. 6-cı turda isə türklərin oyunu yoxdu. Bunun əvəzinə ''ay-ulduzlular'' Yaponiya ilə yoldaşlıq oyunu keçirəcəklər. Türkiyə Futbol Federasiyasından verilən açıqlamada qeyd olunub ki, qarşılaşma sentyabrın 12-də Belçikanın Genk şəhərində yerləşən və 25 min azarkeş tutumuna malik olan ''Kristal Arena''da oynanılacaq. Matçın başlama saatı dah sonra açıqlanacaq. Türkiyə ilə Yaponiya indiyə qədər yalnız iki dəfə qarşılaşıblar. İlk dəfə bu komandalar 1997-ci ilin iyununda qeyri-rəsmi xarakter daşıyan və yaponlar tərəfindən təşkil olunan ''Kirin kuboku''nda üz-üzə gəliblər. Həmin vaxt Yaponiya 1:0 hesabı ilə üstün olmuşdu. İkinci oyun isə bir qədər stajlı fanatların gözəl xatırlayacağı kimi DÇ-2002-yə təsadüf edib. Həmin vaxt da Yaponiya meydan sahibi qismində idi. Amma o turniri bürünc medallarla tamamlayaraq tarixinin ən yaxşı nəticəsinə imza atan Türkiyə 1/8 finalda Yaponiyanı Ümit Davalanın yeganə qolu ilə məğlub etmişdi. Asiya Futbol Konfederasiyanın ən güclü komandası sayılan Yaponiya FİFA-nın yeni reytinqində 20-ci pillədə qərarlaşıb. Türkiyə isə 2 pillə irəliləyərək 41-ci pilləyə yüksəlib.

Xatırladaq ki, Ştefan Kuntsun komandası AÇ-2024-ün seçmə mərhələsində 4 oyuna 9 xalla qrupda liderliyini davam etdirir.