Ölkəmizi 3-cü Avropa Oyunlarında təmsil edən idmançıların mübarizəsi davam edir.

Çimərlik futbolu yığmamızın 3 qarşılaşması artıq geridə qalıb. Millimiz yer aldığı A qrupunda Polşaya 2:7, Portuqaliyaya 2:5, İspaniyaya isə 1:7 hesabı ilə uduzub. Nəticələrdən bəlli olur ki, 3 ağır məğlubiyyət yaşayan yığma rəqiblərin 19 qoluna cəmi 5 qolla qarşılıq verib. Bu rəqiblərin aşkar üstünlüyü deməkdi.

"Football-plus.az"olaraq çimərlik futbolu millimizin baş məşqçisi Zeynal Zeynalovla qeyd olunanlar haqda danışdıq. Mütəxəssisin fikirlərinə keçid alaq.

- Polşada keçirilən hər 3 matç böyükhesablı məğlubiyyətlə bitdi. Qələbə, ən pis halda daha az top fərqi ilə uduzmaq üçün nə çatmadı?
- Hər dəfə nəsə çatışmazlıq oldu. Meydana ruh yüksəkliyi və qələbəyə inamla çıxırdıq. Deyərdim ki, xırda səhvlər ucbatından məğlub olduq.

- Xırda səhvlər deyəndə nələri nəzərdə tutursuz?
- Ən önəmlisi təcrübədi. Beynəlxalq oyunlarda üstünlük əldə etmək istəyirsənsə, hazırlıqlı olmalısan. Belə qarşılaşmalarda elə saniyələr olur ki, təcrübə sözünü deyir. Yarışlara hazırlaşmaq üçün ayrılan vaxt qısa olur. Həmin dönəmdə əlimizdən gələni edirik ki, maksimum hazırlıqlı olaq. Nəticələr göstərdi ki, bu bəs etmir.

- Acınacaqlı vəziyyətdən çıxış yolunu necə tapmaq olar? Uğur qazanmaq üçün indiyə qədər nə edilməli idi?
- Təlim-məşq toplanışları təşkil edilməlidi. Təcrübə qazana biləcəyimiz rəqiblərlə yoldaşlıq oyunlarında gücümüzü sınamalıyıq. Ölkədə çempionatlar keçirilməlidi. Bizdə həm oyun, həm də futbolçu qıtlığı var. Bu heç kimə sirr deyil.

- Sadaladıqlarınız indiyə qədər niyə reallaşmayıb?
- Bu, "yuxarılar"a veriləcək sualdı. Biz, sadəcə, icraçıyıq. Verilən tapşırıqları yerinə yetiririk. Həm düşərgədə, həm də meydanda əlimizdən gələni edirik. İl ərzində cəmi 2-3 ay məşq edə bilirik. Həqiqətən də dediyim məsələlər komanda üçün böyük çətinliklər yaradır. Hazırda yaradılan şəraitlə ayaqlaşmağa məcburuq.

- İyunun 30-da 5-8-ci yerlər uğrunda mübarizə aparacaqsız. Bu matçlar haqda nə düşünürsüz?
- Rəqiblər hələ ki bəlli deyil. Bütün oyunlar bitdikdən sonra kimlə oynayacağımız müəyyənləşəcək. Rəqibin kimliyindən asılı olmayaraq, məğlubiyyət, təbii ki, heç kimi qane edə bilməz. Yenə də ruh yüksəkliyi və qələbə əzmi ilə meydana çıxıb son ana qədər mübarizə aparacağıq.

KƏNAN BAHADIR