Yeni transferlər “Səbail”ə keçidlərini şərh etdilər
Bayıl təmsilçisi yeni transferlər də reallaşdırıb.
"Football-plus.az" xəbər verir ki, klub 2 yerli futbolçu ilə birillik müqavilə bağlayıb. Söhbət Coşqun Diniyevlə Amil Yunanovdan gedir.
Bilindiyi kimi, Coşqun həm də millinin üzvüdü. Son mövsümü “Zirə”də keçirən yarımmüdafiəçi 30 matçda meydana çıxıb. Onun hesabında 2 qol və 1 məhsuldar ötürmə var. Futbolçunun “dənizçilər”ə keçidi ilə bağlı fikirlərini də öyrəndik:
“Son mövsüm başa çatandan sonra bir neçə təklifim oldu. Buna görə də düşünməyə ehtiyacım var idi. Bir qədər fikirləşəndən sonra “Səbail”ə keçməyə qərar verdim. Bu keçidin ilk növbədə komandamız üçün uğurlu olacağına ümid edirəm. Mənim üçün ən vacib məqsəd budu. “Dənizçilər”in uğurları üçün çalışacam. Növbəti mövsümdə həm nəticə, həm də oyun baxımından daha yaxşı “Səbail” görəcəyimizə əminəm. Bir futbolçu kimi ən çox istədiyim komandamızın uğurlu çıxışında pay sahibi olmaqdı”.
Amil Yunanov isə 2022/23 “futbol ili”ndə uğursuzluğa düçar olan “Şamaxı”da çıxış edib. 22 dəfə meydana çıxan hücumçu 7 dəfə rəqib qapısının torunu silkələyib. Futbolçu “Şamaxı”nı tərk etməsinin səbəbləri və “Səbail”ə keçidi haqda qəzetimizə bunları dedi:
“Bəli, bir az əvvəl müqavilə bağladım. İnanıram ki, “Səbail”də uğur qazana biləcəm. Əlimdən gələni edəcəm ki, yeni komandama tezliklə uyğunlaşım və matçlarda lazımi qədər dəstək verə bilim. “Şamaxı”dan ayrılıq isə gözlənilirdi. Klub premyer-liqada qalsa belə, orda qalmayacaqdım”.
KƏNAN BAHADIR
Digər xəbərlər
