Yaxın müddətdə PSJ-nin başına keçəcəyi gözlənilən Luis Enrike telefonla komandanın aparıcı üzvlərindən olan Neymarla söhbət edib.


“Football-plus.az” xəbər verir ki, bu məlumatı Fransa mətbuatı yayıb. İspaniya yığması və ''Barselona''nın sabiq baş məşqçisi Neymardan həyat tərzinə fikir verməyi tələb edib. O, braziliyalı ulduzun həm meydanda, həm də adi həyatda nümunəvi oyunçuya çevrilməsini istəyir. Hərçənd ''sambaçı''nın hələ də komandada qalıb-qalmayacağı bilinmir. Enrike Neymara onun komandada qalmasının tərəfdarı olduğunu bildirib. Amma onu da əlavə edib ki, Neymar ayrılacağı təqdirdə onun qərarını anlayışla qarşılayacaq. Ümumiyyətlə, 53 yaşlı mütəxəssis PSJ rəhbərliyinə statusundan asılı olmayaraq heç bir oyunçunu zorla komandada saxlamaq istəmədiyini deyib.

Daha öncə 2014/15-də ''Barselona''nın heyətində məhz Enrikenin başçılığı altında Çempionlar Liqasının qalibi olan Neymar ən son hamilə olan sevgilisinə xəyanət etdiyinə görə öz səhifəsində üzrxahlıq paylaşımı etməsi ilə diqqət çəkmişdi.