"İsveç və Avstriyaya ağır məğlubiyyətlərdən sonra keçirilən iclasda Canni de Byazinin göndərilməsi gündəmdə idi. Sadəcə, həm müqaviləsi olduğuna, həm də Estoniya ilə taleyüklü oyuna görə onu saxlamaq qərarına gəldik. İnanırdıq ki, Baltikyanı ölkə təmsilçisinə qalib gələcəyik, ruh yüksəkliyi əldə edərək başqa oyunlarda da uğurlu çıxış edəcəyik. Amma "Dalğa Arena"da baş tutan oyunda olduqca zəif çıxış etdik, əsasən də ilk yarıda. Bu bir daha onu göstərir ki, millimizin seçmə mərhələyə uğursuz startı davam edir. De Byazinin göndərilməsinə gəlincə, bununla bağlı hələ ki nə iclasımız olub, nə də təklif. Mən şəxsi fikrimi deyim. İtaliyalı mütəxəssisin göndərilməsi millimizlə bağlı bütün çatışmazlıqlara, uğursuzluqlara nöqtə qoyacaqsa, biz bunu rahat edə bilərik. Amma məsələyə geniş çərçivədən və obyektivlik prizmasından baxsaq, bu gün ölkənin əsas komandasının “qara zolaq”da olmasının əsas səbəbkarı De Byazi deyil. Təbii ki, yığmamızın seçmə mərhələyə uğursuz başlaması və nəticələri müzakirəyə açıqdı. Hamının da buna görə bizi tənqid etməyə haqqı var. İcraiyyə Komitəsi olaraq, hər iclasımızda millinin uğursuzluğunu incələyir, baş məşqçinin təhlillərini nəzərdən keçirir, onun fikirlərini də dinləyirik. Hələ bilinmir, növbəti iclasımız nə vaxtdı. Olan kimi De Byazidən Estoniya ilə oyundakı uğursuzluğun hesabatını tələb edəcəyik. Ehtiyac olarsa, onun göndərilməsinə də iclasda baxıla bilər".