"Açığı, Mahir Məmmədovun səsləndirdiyi ifadəni oxumamışam. Amma fikri olduqca yanlışdı. Özüm daxil, hər bir yerli məşqçinin Azərbaycan millisində çalışması böyük şərəf olardı. Ona görə də öz mütəxəsislərimiz heç vaxt pul məsələsini qabartmazlar. Hansı məvacibi versələr, can-başla millidə işləməyə hazır olarlar. Açığı, heç kimin, o cümlədən də De Byazinin pulunu saymamışam. Kim nə qədər alır, verir, deyə bilmərəm. Ümumiyyətlə, pul söhbətlərindən maksimum uzaq qaçan adamam. Fikirim qətidi, millidə ancaq yerli mütəxəssislər çalışmalıdı. Azərbaycanlı məşqçilər həm futbolumuza, həm də futbolçularımıza yaxşı bələddi, nəinki əcnəbilər. Amma bir halda ki, yerli kadrlara şans verilmirsə və bu qəti qərardısa, o zaman elə italiyalının postunda qalması məsləhətdi. Bəzi şəxslər bu fikrimi AFFA-da kimlərəsə yarınmaq kimi qəbul edirlər. Söylədiklərimi təhrif edərək, başqa yerə yozan və hamını özləri kimi bilənlər üçün bir daha təkrar edirəm. De Byazi 2 ildən çoxdu millimizə rəhbərlik edir, pis-yaxşı həm AFFA rəhbərliyi, həm futbolçularla dil tapır. Azdan-çoxdan çempionatımıza da bələddi. Onun yerinə başqa bir əcnəbi məşqçi gətirməklə yenidən 1-2 il vaxt itirəcəyik. Seçmə mərhələdə uğursuz çıxış edəndə başlayacağıq qınamağa və "bunu da yola salaq" deyəcəyik. Ən əsası, De Byazinin əvəzinə gələn əcnəbi məşqçi mütləq ki, daha çox pul tələb edəcək. Bütün bu sadalananlardan sonra belə qənaətə gəlmişəm ki, italiyalını saxlamaq daha məntiqlidi”.