"Yığmamızdan qələbə gözləyirdim. Amma ilk hissədə çox bərbad oynadılar. Hirsimdən partlayırdım. İkinci hissədə toparlandıq. De Byazi heyətə əl gəzdirdi. Hesabı bərabərləşdirdik, 2-ci qol üçün də şanslarımız oldu. Bir epizodda top dirəkdən qayıtdı. Bəxtimiz gətirmədi. İdmanda bəxt amili də var. Məsələn, sovet dönəmində özümüzdən qat-qat zəif Odessa SKA-sına ilk hissədə 2 top fərqiylə uduzur, fasilədən sonra isə 3 qol vurub qalib ayrılırdıq... De Byazini göndərməyə gəlincə, onun hazırda müqaviləsi var. Vaxtından əvvəl yola salsaq, böyük məbləğdə təzminat tələb edəcək. Həmçinin onun yerinə gətirəcəyimiz yeni məşqçi də az pul istəməyəcək. Çoxları deyir ki, yerli məşqçi daha az məvacibə gələcək. Belə deyil. Əvvəla ona görə ki, hər bir mütəxəssis ölkənin əsas komandasının “sükanı arxasına” keçirsə, yaxşı da maaş alır. İkincisi, “yerli mütəxəssis az maaş almalıdı” deyə qanun yoxdu. Bu qeyri-peşəkarlıq olardı. Şəxsən mənə görə azərbaycanlı məşqçi də yığmaya gəlsə, De Byazidən az maaş almamalıdı. Qısası, italiyalını göndərməməkdə əsas məsələ iqtisadidi. Çünki De Byazini yola salsaq, ikiqat xərcə düşəcəyik. Ona görə bu məsələdə ağıllı və ehtiyatlı davranmalıyıq".