“İllərlə "Səbail"dən evimə çörək aparmışam” – istefa verdi və günahını boynuna aldı
“Səbail”də Müşahidə Şurasının növbəti iclası keçirilib. İcraçı direktor Fərəc Əliyevlə baş məşqçi Şahin Diniyevin də iştirak etdiyi iclasda əsas komandanın növbəti mövsümə hazırlıqla bağlı planları müzakirə olunub, görülmüş işlər ətrafında fikir mübadiləsi aparılıb. Fərəc Əliyev ötən mövsüm “Səbail”in uğurlu çıxış etmədiyini əsas gətirərək tutduğu vəzifədən istefa verdiyini bildirib. Müşahidə Şurası istefanı qəbul edib. Yeni təyinata qədər qeyd olunan vəzifənin icrası müvəqqəti elə Fərəc Əliyev tərəfindən həyata keçirilicək.
İstefa ilə bağlı fikirlərini öyrənmək üçün Fərəc Əliyevlə əlaqə saxladıq. Onun "football-plus.az"a dedikləri:
"7 il idi "Səbail"də çalışırdım. Klubun uğurlu olub-olmamasında ən böyük pay sahibi mənəm. Ən azı mən belə düşünürəm. Bilindiyi kimi, ötən mövsüm işlər yolunda getmədi. Az qala premyer-liqanı tərk edəcəkdik. 1-ci diviziona düşüb-düşməyəcəyimiz sonuncu matçda bəlli oldu. Halbuki "Səbail" daha yuxarı pillələrə layiqdi. Bunun səbəbkarı özüməm. Baş məşqçi Şahin Diniyev komandanın rəhbərliyinə gələndə vəziyyət daha pis idi. Onun sayəsində premyer-liqada qaldıq. Heyətdə xeyli irəliləyiş oldu. Bəli, yeni təyinata qədər işimi davam etdirəcəm. İllərlə "Səbail"dən evimə çörək aparmışam. İndi birbaşa "sağ olun, mən getdim" deməyə haqqım yoxdu. Klubu qarşıda təlim-məşq toplanışı və yeni transferlər gözləyir. Yeni icraçı direktor bəlli olana qədər bu mövzularda təcrübəmi bölüşməyi özümə borc bilirəm. Başqa klublardan təklif yoxdu. Olsa belə, hələ ki baxmayacam".
KƏNAN BAHADIR
Digər xəbərlər
