"Rəqiblərin hər biri Avropada seçilmiş taekvondoçudu" - Eltac Qafarov
“Avropa Oyunlarının finalında ispaniyalı ilə görüşmək istəyirəm”.
“Football-plus.az” xəbər verir ki, bunu Azərbaycan taekvondoçusu Eltac Qafarov Polşada keçiriləcək 3-cü Avropa Oyunları barədə Milli Olimpiya Komitəsinin mətbuat xidmətinə açıqlamasında deyib.
74 kq çəki dərəcəsində çıxış edən idmançı yarışda güclü rəqiblərlə qarşılaşacağını bildirib:
“İspaniyalı taekvondoçu bu çəkidə dünyanın bir nömrəsidi. 74 kq-da ümumilikdə 13 idmançı mübarizə aparacaq. Onların hər biri Avropada seçilmiş taekvondoçudu. Buna baxmayaraq, məqsədim bütün gücümlə mübarizə aparıb, Azərbaycan bayrağını dalğalandırmaqdı”.
2022-ci ildə gənclər arasında Avropa çempionatının bürünc medalını qazanan Eltac Qafarov Avropa Oyunlarına hazır olduqlarını söyləyib:
“Məşqlərimiz intensiv şəkildə gündə iki dəfə davam edir. Texniki və taktiki məşqlərimizi etmişik. Məşqçilərimiz bizə dəstək olurlar. Yarışa hazırıq. Ümid edirəm ki, hər şey yaxşı yekunlaşar, çəkdiyimiz əziyyət yerdə qalmaz. Komandada əhvali-ruhiyyə yüksək səviyyədədi, özümüzə inanırıq”.
Qeyd edək ki, 3-cü Avropa Oyunları iyunun 21-dən iyulun 2-dək təşkil olunacaq.
