Ermənistan şahmatçıları iyulun 30-dan avqustun 24-dək Bakıda keçiriləcək dünya kubokuna qatılmayacaq. Bu haqda həmin ölkənin şahmat qurumunun vitse-prezidenti Smbat Lputyan məlumat verib:

Qeyd olunanlarla bağlı Azərbaycan Şahmat Federasiyasının prezidenti Mahir Məmmədovun fikirlərini öyrəndik. Onun "Football-plus.az"a dedikləri belə oldu:

“Bakı mütəmadi olaraq şahmat və digər idman növləri üzrə mötəbər yarışlara evsahibliyi edib. 2015-ci ildə paytaxtımızda nüfuzlu dünya kubokunun təşkilatçılığı ən yüksək səviyyədə həyata keçirilib. Mötəbər yarışda iştirak edən erməni şahmatçılar - Levon Aronyan, Qabriel Sarkisyan, Samvel Ter-Sahakyan və Qrant Melkumyanın yarışda iştirakı ilə bağlı heç bir problem yaşanmayıb. Onlar digər şahmatçılarla birlikdə turnir zalında rahat şəkildə şahmat mübarizəsində iştirak edib. Dünya kubokundan sonra erməni şahmatçısı Levon Aronyan hətta Bakının tarixi məkanı İçərişəhərdə olub, turistlərin sevimli yeri – “Brilliant əl” filminin çəkildiyi küçəni ziyarət edib. Aronyan yarışdan sonra verdiyi müsahibələrdə də ölkəmizin təşkilatçılığını yüksək qiymətləndirib və heç bir problemin olmadığını etiraf edib. Bununla yanaşı, Bakının evsahibliyi etdiyi 1-ci Avropa Oyunlarında da erməni şahmatçılar iştirak edib, açılış mərasimində paraddan keçib.
Hazırkı məqamda təhlükəsizlik məsələsi ilə bağlı fikirlər bəhanə xarakteri daşıyır.

Azərbaycan Şahmat Federasiyası 2023-cü ilin iyul-avqust aylarında Bakıda təşkil olunacaq dünya kubokunun yüksək səviyyədə keçiriləcəyini bildirir. Erməni şahmatçılar da dünya kubokunun digər iştirakçıları kimi təhlükəsiz şəraitdə mötəbər yarışda iştirak edə bilər.

Gənclər və İdman Nazirliyi hökumətimiz adından bütün iştirakçılara, o cümlədən erməni şahmatçılara təhlükəsizliklə bağlı zəmanət verib. Dünya kubokuna vəsiqə qazanan bütün iştirakçılar rahat şəkildə bu yarışda iştirak edəcək".

Maraq üçün əlavə edək ki, 2015-ci ildə Bakıda keçirilən analoji yarışa Levon Aronyan başda olmaqla 4 erməni qatılmışdı. Hazırda ABŞ-ı təmsil edən Aronyan nədənsə, bu dəfə Bakıya gəlməyi lazım bilməyib. Tanınmış şahmatçılardan son dünya çempionu Din Lijen (Çin), Hikaru Nakamura (ABŞ), Əlireza Firuzca (Fransa), Vişvanatan Anand (Hindistan) və Rixard Rapport (Macarıstan) da yarışa qatılmayacaq. FİDE-dən fərdi dəvət alan Sergey Karyakin isə iştirak etməməsinin səbəbini Rusiya bayrağı və himni olmadan çıxışı arzulamaması ilə izah edib.

Qeyd edək ki, FİDE yarışda "on-line" iştirak etmək istəyən ermənilərin təklifini qəbul etməyib.

KƏNAN BAHADIR